مه‌سرور بارزانى: ژبه‌ر سه‌ركه‌فتنێن دژى داعشێ ئه‌م دهێینه سزا دان
ئه‌ڤرۆ نیۆز:
ئه‌ڤرۆ رێككه‌فتى 13 / 11/ 2014 ، شیره‌تكارێ جڤاتا ئاسایشا هه‌رێما كوردستانێ مه‌سرور بارزانى پێشوازى ل خانم رێكا سه‌مه‌ركانى مه‌زنه شیره‌تكارا سه‌رۆك وه‌زیرێن وه‌لاتێ هنگاریا بۆ كاروبارێن ئاسایشا وزه و تێبۆر ساتمارى بالیۆزێ هنگاریا ل به‌غدا كر.
د هه‌ڤدیتنه‌كێ دا به‌حسێ ره‌وشا ئاسایشا هه‌رێما كوردستانێ و شه‌رێ تیرۆرێ و پێدڤیا هاریكارى و پشته‌ڤانیا زێده‌تر ژ ئالیێ جڤاكێ نێڤده‌ولى ڤه هاتنه كرن.
ددرێژاهیا وێ كۆمبوونێ دا مه‌سرور بارزانى سوپاسیا حوكمه‌تا هنگاریا كر، بۆ پشته‌ڤانیا له‌شكرى و مرۆڤایه‌تى یا بۆ هه‌رێما كوردستانێ كرى، كو پشكه‌كه ژ هه‌ڤپه‌یمانیا نێڤده‌ولى یا دژى تیرۆرستێن داعشێ، هه‌روه‌سا دوپاتى ل سه‌ر پێدڤیێن هێزێن پێشمه‌رگه‌ى كر، كو پێدڤیه حوكمه‌تا عیراقا فیدرال وه‌ك پێگیریا دستورى یا چه‌ك و پشته‌ڤانیا هه‌رێما كوردستانێ دابین بكه‌ت.
مه‌سرور بارزانى هه‌روه‌سا گۆت: مه داخوازا هاریكارى و پشته‌ڤانیێ ژ عیراقێ كریه، به‌لێ نه‌یا ئاماده‌یه هاریكاریا هه‌رێما كوردستانێ بكه‌ت، ئه‌م به‌رانبه‌رى وان سه‌ركه‌فتنێن دژى داعش ب ده‌ست مه‌ڤه هاتین دهێینه سزادان، دده‌مه‌كى دا به‌غدا ل گه‌ل شكه‌ستنان دهێته خه‌لاتكر.
سه‌باره‌ت پێشڤه‌چوونا پێشمه‌رگه‌ى د شه‌رێ دژى داعشێ دا، ژئالیێ خوه‌ڤه مه‌زنه شیره‌تكارا سه‌رۆك وه‌زیرێن هنگاریا بۆ كاروبارێن ئاسایشا وزه ئاماژه‌دا هندێ، داعش ل مه‌یدانا شه‌رى ل هه‌رێما كوردستانێ شكه‌ستن خوار.
هه‌روه‌سا گۆت: بێى هه‌وه خه‌لكه‌كێ دى چو شیانێن باش نه‌بووینه، ئه‌م دانپێدانێ بۆ ئێكێ دكه‌ین، كو هه‌موو تێدا هه‌ڤپشكن.
ل دووماهیا كومبوونێ هه‌ردو ئالیان ته‌كه‌س ل سه‌ر پێدڤیا ره‌وانه‌كرنا هاریكارى یێن له‌شكرى و پشته‌ڤانیا هه‌رێما كوردستانێ ژ ئالیێ جڤاكێ نێڤده‌ولى ڤه.
فوتۆ (فرهاد ئه‌حمه‌د)
