مه‌سرور بارزانی خواستا هه‌رێمێ بۆ چاره‌سه‌ركرنا كێشه‌یان ل گه‌ل به‌غدا دووپات دكه‌ت
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل (ڤیلله ڤاریۆلا) بالیۆزێ ئێكه‌تیا ئه‌ورۆپا ل ئیراقێ كر.
د دیداره‌كێ دا كو (تۆركیلد بیك) به‌رپرسێ نوو یێ نڤیسینگه‌ها ئێكه‌تیا ئه‌ورۆپا ل هه‌رێما كوردستانێ به‌رهه‌ڤبووی، سه‌رۆكێ حوكمه‌تا هه‌رێمێ پیرۆزباهیا ده‌ستبكاربوونێ لێكر و هیڤیا سه‌ركه‌فتنێ بۆ خواست.
ته‌وه‌ره‌كێ سه‌ره‌كی یێ كۆمبوونێ، تایبه‌ت بوو ب پێشڤه‌برنا هاریكاریا و هه‌ماهه‌نگیێ د ناڤبه‌را هه‌رێما كوردستانێ و ئێكه‌تیا ئه‌ورۆپا دا، ب تایبه‌تی پشته‌ڤانیكرنا چاكسازیێن كابینه‌یا نه‌هێ یا حوكمه‌تا هه‌رێمێ بوارێ هه‌مه‌جۆركرنا ئابووری و پشته‌ڤانیا كه‌رتێ چاندنێ و ڤه‌دیتنا بازاڕێ ده‌ره‌كی و هنارتنا به‌رهه‌مێ ناڤخوه‌ییێ كوردستانێ بۆ بازارێن ئه‌ورۆپا، هه‌روه‌سا باس ل گرنگیا چاكسازیكرنێ د سیسته‌مێ به‌نكی ل كوردستانێ و ده‌لیڤه‌یێن هاریكاریكرنا ئێكه‌تیا ئه‌ورۆپا د ڤی بواری دا كر.
چاره‌سه‌ركرنا كێشه‌یێن هه‌رێما كوردستانێ و حوكمه‌تا فیدرال ل سه‌ر بنه‌مایێ دستووری، پشكه‌كا دی یا دانوستاندنێن كۆمبوونێ بوون، سه‌باره‌ت ڤێ چه‌ندێ سه‌رۆكێ حوكمه‌تا هه‌رێما كوردستانێ خواستا هه‌رێمێ بۆ چاره‌سه‌ركرنا كێشه‌یان دوووپات كر و ئاماژه ب وێ چه‌ندێ دا كو ته‌رخانكرنا شایستێن دارایی یێن هه‌رێما كوردستانێ ژ بودجه‌یا گشتی یا ئیراقێ دا بۆ سالا 2023 ب شێوه‌یه‌كێ دادپه‌روه‌رانه و ب گۆره‌ی ڕێژه‌یا ئاكنجیێن هه‌رێما كوردستانێ ل سه‌ر بنه‌مایێ دستووری، دشیاندایه ببیته ده‌ستپێكه‌كا باش ب ئاراسته‌یا چاره‌سه‌ركرنا بنه‌ره‌تی یا هه‌موو كێشه‌یێن د ناڤبه‌را حوكمه‌تا فیدرالی و هه‌رێما كوردستانێ دا هه‌ین.
