مه‌سرور بارزانی: ژ ئه‌گه‌رێ چاكسازیێ مه شیا ژ قه‌یرانان ده‌رباز ببین
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، د گۆتارا خوه دا د كۆنفرانسێ په‌روه‌رده‌یێ یێ زانكۆیا ئه‌مریكی كوردستان ل دهۆكێ راگه‌هاند” د كارناما حوكمه‌تا هه‌رێمێ دا مه ئاماژه دایه دێ گرنگیه‌كا تایبه‌ت ب په‌روه‌ردێ و خواندنا بلند ده‌ین و دێ كاركه‌ین بۆ پێشخستن و بلندكرنا ئاستێ زانكۆ و په‌یمانگه‌هان، بۆ باشتركرنا ره‌وشا خواندنێ ب گشتی ل هه‌رێمێ”.
مه‌سرور بارزانی گۆت ژی” دو سالێن بۆری ژ ئه‌گه‌رێ به‌لاڤبوونا كۆرۆنایێ و قه‌یرانا دارایی، ره‌وشه‌كا نه ئاسایی په‌یداببوو، به‌لێ ل گه‌ل وێ چه‌ندێ ژی نه راوه‌ستاین و به‌رده‌وام بووین و مه درێژی ب چاكسازیان دا د هه‌موو بواران دا”.
دیاركر” ل سه‌ر پلانا خوه د به‌رده‌وامین بۆ هه‌مه‌جۆركرنا ژێده‌رێن داهاتی، كو بێگومان ژئه‌گه‌رێ وان چاكسازیان، مه شیا وان قه‌یرانان ده‌ربازكه‌ین، ئه‌م بزاڤه‌كا مه‌زن دكه‌ین و كاردكه‌ین سیسته‌مێ په‌روه‌ردێ و خواندنا بلند یا مه ب ئاسته‌كێ پێشبێخین، كو گونجای بیت ل گه‌ل پێشكه‌فتنێن چه‌رخێ 21 ێ، كو ئارمانجا مه ئه‌وه قوتابیێن كوردستانێ فێری وێ پسپۆری و شاره‌زاییێ ببن كو د پێدڤی نه بۆ بازار و سه‌قامگیریا كوردستانێ، بۆ وێ ئێكێ هه‌م هاریكار بیت بۆ دیتنا ده‌لیڤێن كاری و كێمكرنا رێژا بێكاریێ، هه‌م ژی پشته‌ڤانیه‌كا ب هێز بیت بۆ گه‌شه‌پێدانا ئابووری و ئارامیا وه‌لاتێ مه”.
خویاكر ژی” سیسته‌مێ په‌روه‌ردێ گرێدای قوتابی و مامۆستا و خه‌لكێ ئه‌كادیمی یه، له‌وما پێدڤیه د پرسا چاكسازیێ د په‌روه‌ردێ و خواندنا بلند دا، سه‌رنج و تێبینی و پێشنیازێن هه‌موو وان لایه‌نان ل به‌رچاڤ بهێنه وه‌رگرتن، ئه‌ز به‌رده‌وام د وێ باوه‌ریێ دامه كو رێبه‌رێن داهاتی یێن ملله‌تێ مه ب رێیا په‌روه‌رده‌كا دروست و پێشكه‌فتی دێ دروست بن، كو بنه‌مایێ ئاڤكرنا جڤاكه‌كێ ساخله‌مه، پێدڤیه ئارمانجا سه‌ره‌كی ژ خواندنێ تنێ بده‌ستڤه‌ئینانا باوه‌رنامێ نه‌بیت، به‌لكو ئارمانجا سه‌ره‌كی فێربوون و بلندكرنا ئاستێ ره‌وشه‌نبیری و كه‌لتووری یێ جڤاكی بیت”.
هێشتا گۆت” وه‌كو پشكه‌ك ژ پرۆسا چاكسازیێ د بوارێ په‌روه‌ردێ و فێركرنێ دا، مه ل به‌ره ده‌سته‌یه‌كێ پێكبینین بۆ هه‌لسه‌نگاندن و دانا باوه‌ریێ ب داموده‌زگه‌هێن ئه‌كادیمی، كو دبێژنێ ( ده‌سته‌یا نیشتمانی یا دانا باوه‌ریێ) كو كارێ وێ ده‌سته‌یێ هه‌لسه‌نگاندنا داموده‌زگه‌هێن ئه‌كادیمی یه، ل دووڤ ستانداردێن نێڤده‌وله‌تی یێن خواندنێ ب ئارمانجا پێشخستنا وان و دانانا پلانه‌كا ستراتیژی، بۆ چاره‌سه‌ركرنا هه‌موو كێشێن په‌یوه‌ندیدار د بوارێ په‌روه‌ردێ و خواندنێ دا، دشیاندایه ئه‌و ده‌سته‌یه ببیته نموونه‌ك ژی بۆ سه‌رانسه‌ری ئیراقێ”.
ئاماژه‌كر” پێدڤیه حه‌زكرنا وه‌لاتی دناڤ ناخێ دلێ گه‌نجێن مه بچه‌سپیت، پێدڤیه رێزێ ل دیرۆكا خوه بگرن، ژ دیرۆكێ فێربین، به‌لێ رێزگرتن ل دیرۆكێ بۆ وێ ئێكێ یه كو ئه‌م بزانین ژ كیرێ هاتینه و مه چه‌ند ئازار دیتینه و ب چ قۆناغه‌كا دژوار دا ده‌رباز بووینه، چاوان دێ شێین رێگریێ ل دووباره‌بوونا كاره‌ساتێن بۆری بكه‌ین و پاشه‌رۆژه‌كا گه‌شتر په‌یدا بكه‌ین”.
