مه ژ هه‌موو یانه‌یان خواست پشكداریێ بكه‌ن ب تنێ پێنج یانه به‌رهه‌ڤبوون
ڕاپۆرت: تاهر رێكانی
تیما باسكتبۆلا یانه‌یا زاخۆ بناسناڤێ خولا هه‌رێما كوردستانێ بۆ یانه‌یێن پلا نایاب هاته خه‌لاتكرن پشتی د یاریا دووماهیێ دا سه‌ركه‌فتنه‌كا مه‌زن لسه‌ر یانه‌یا ده‌ربه‌ندیخان ئینای ب(87-54) خالان، د یاریا واندا ئه‌وا ل هۆلا وه‌رزشی یا زاخۆ هاتبونه كرن.
لده‌ستپێكێ جوتیار عه‌لی راهێنه‌رێ یانه‌یا زاخۆ گۆت: سوپاس بۆ خۆدێ ماندیبوونا مه ب هه‌روه نه‌چووی و شیان ناسناڤێ خولێ بده‌ستخۆڤه بینین، هه‌رچه‌نده مه حه‌سكر پتر یانه پشكداری د خولێ دا كربا داكو پتر مفا ژێ هێته وه‌رگرتن، لێ هه‌ر چه‌وا بیت دڤێ خولێ دا باشترین یاریزانێن هه‌ر چار پارێزگه‌هێن هه‌رێمێ پشكداربوون و ئاستێ وان گه‌له‌ك یێ باشبوو، نه‌كو كێم یانه‌یان پشكداری كر ئاستێ خولێ یێ لاواز بوو به‌رۆڤاژی ڤێ چه‌ندێ هندی هژمارا یانه‌یان یا كێم بیت بێ گۆمان دێ ئاستێ خولێ بهێزتر بیت، وه‌كو یا دیار دۆرێن 16 یاریزانێن پشكدار د خولا پیشه‌كارێن ئیراقێ دا پشكداربوون و زێده‌باری 12 یاریزانێن هه‌لبژارتیێ ئیراقێ یێن ژیێن جودا پشكداربوون له‌ورا ئاسته‌كێ مه‌زن هاته نیشاندان، لسه‌ر خاترا ناڤێ خولا هه‌رێمێ یا پێدڤی بوو پشكداری زێدەتربان چونكه ئه‌ڤ خوله ژ خولا ئیراقێ فه‌رتره بوو مه وه‌كۆ هه‌رێم.
ژلایێ خوەڤە ئه‌نه‌س كاروان یاریزانێ یانه‌یا گاره لدۆر لاوازیا ئه‌نجامێن تیمێ گۆت: تیمێن به‌رامبه‌ر مە بهێزتربوون و شیانێن وان یێن دارایێ ژمه چێتربوون، هه‌رچه‌نده ژلایێ ته‌كنیكێ و ته‌كتیكێ ڤه تیما مه یا باشبوو هه‌ر وه‌سان یاریزانێن مه د رۆژا خۆدا نه‌بوون ئه‌ڤه ئه‌گه‌رێن سه‌ره‌كی بوون، یا ژ ڤێ نه‌خۆشتر كه‌سێ چ پشته‌ڤانی و هاریكاریا دارایێ بۆ ڤان یاریزانان نه‌كر، له‌ورا هه‌ر ژ ده‌ستپێكێ بێ ئۆمێدی لده‌ف په‌یداببوو، هه‌ر چه‌نده راهێنه‌رێن مه یا پێدڤی و د شیانێن واندا بۆ مه كر لێ ل دووماهیێ ژی دێ هه‌ر بێژین یاریه تیمه‌ك دێ هێته دۆراندن و ئێك دێ بسه‌ركه‌ڤیتن،
لدووماهیێ هشیار دۆبانكی جێگرێ سه‌رۆكێ فیدراسۆنا باسكێت بۆلا هه‌رێما كوردستانێ گۆت: مه وه‌كو فیدراسیۆن داخوازنامه بۆ هه‌موو یانه‌یێن هه‌رێمێ فرێكربوو لێ بتنێ پێنج یانه‌یان به‌رهه‌ڤیا خۆ دیاركر کو ئاستێ وان گه‌له‌ك یێ باشبوو، یا ژ وێ گرنگتر هه‌موو یاریزان ژ پارێزگه‌هێن هه‌رێمێ بوون و بێی یاریزانێن پیشه‌كار، سه‌ره‌رای ڤێ چه‌ندێ ئاستێ تیمێن پشكدار نێزیكی تیمێن خولا ئیراقێ بوون، ئه‌ڤه ژی وێ د گه‌هینیت كو رۆژ ب رۆژێ یاریا باسكێت بۆلێ ل هه‌رێمێ گه‌شێ دكه‌ت و گه‌هشتیه ئاسته‌كێ بلند له‌ورا یا پێدڤییه یانه‌یێن هه‌رێمێ گرنگیێ ب تیمێن ڤێ یاریێ بده‌ن بتایبه‌ت یێن ژیێن جۆدا داكو نفشه‌كێ پری به‌رهه‌م ژێ ده‌ركه‌ڤیت، هەکە پشتەڤانی بۆ هەبیت گەشبینن دێ پاشەرۆژەکا گەشتر پەیدابیت، دڤێت ژبیر نەکەین سوپاسیا گارگێریا یانه‌یا زاخۆ بكه‌ین كو تێچویێ ڤێ خولێ و یانه‌یێن پشكدار ب ستویێ خۆڤه گرتبوو وەکو بارسڤکییە بۆ فدراسیۆنێ و یانەیێن پشکدار، ئەڤە ژی خالا سەرکەفتێ و پێشکەفتنێ یە.
بۆ زانین هه‌ڤركیێن ڤێ خولێ ب شێوێ خول ئێك قۆناغ ب پشكداریا هه‌ر ئێك ژ یانه‌یێن زاخۆ، گاره، سابیس، سۆلاڤا نوو و ده‌ربه‌ندیخان بۆ ماوه‌یێ پێنج رۆژان هاتبوو برێڤه‌برن کو دهێتە هژمارتن ئێکەم چالاکییا فدراسیۆنێ د وەرزێ ئەڤ سالە دا.
