میتۆدا سوقراتی
بەهزاد بەهرام
من ئەڤ پرسە ئازراندن
كی ژ مە بۆ ئێكەم جار
دەستپێشخەر بوویە؟
كێ ژ مە هەست و لڤین
بەرامبەر یێ دی دەربرینە؟
كێ ژ مە د دەریا ئاشۆپاندا
یێ دی فێری مەلەڤانیا كرییە؟
كێ ژ مە دچاڤێن یێ دی دا
خوە ڤەدیتیەڤە؟
كێ ژ مە سۆز و سۆزنامەك
بۆ یێ دی پەنجەمۆر و ئیمزا كرییە؟
كێ ژ مە ب دروستاهی خوە ناسكرییە
هەتا یێ دی ناس بكەت؟
من یان ژی تە؟!
كێ ژ مە ل سناپی نامێن ب شەڤ
ل ناڤەراستا رۆژێ ڤەكرینە و خاندینە؟
كێ ژ مە كزگریۆك دگەورییا
یێ دی دا خەندقاندییە؟
كێ ژ مە روومەتێن یێن دی
ژ رۆندكان ڤەمالینە؟
كێ ژ مە رێكا خوە گوهۆرییە
ژ راستە راست بۆ چەپ و چەپ؟
كێ ژ مە باخێ دلی یێ دی
ژ بهارا بوهاری
گوهۆرییە بۆ پاییزا پاییزی؟
من یان ژی تە؟!
كێ ژ مە پێ دزانیت
سوقرات حەز ژ بێدەنگیێ ناكەت؟
ئەڤجا وەرە پێشبەری من
بلا بەرسڤدان ب میتۆدا سوقراتی بیت.
