مێڤانێ گران ل سەر دلان بارە
دلۆڤان ئاكرەیی
د ناڤ جڤاكێ مە یێ كوردی دا، مێڤانداری تنێ ئەركەكێ جڤاكی نینە، بەلكو پشكەكە ژ ناسنامە و رەوشتێ مە یێ رەسەن، مەزنێن مە گۆتینە: مێڤان خێرا مالێ یە، لێ ڤێ خێرێ و ڤێ رێزێ ژی هندەك بنەما و سنوورێن خۆ یێن هەین كو دڤێت بهێنە پاراستن دا كو شكۆ و رێزا وێ نەهێتە شكاندن.
د جیهانا ئەڤرۆ دا، دەم بوویە گرانترین سەرمایە؛ هەر مالەك و هەر خێزانەك خودان بەرنامە و مژوولیێن خۆ یێن تایبەتن و هاتنا مێڤانی ب بێ ئاگەهداركرن، یان د دەمێن نەگونجای دا، باندۆرەكا نەرێنی ل سەر ڤی سیستەمی دكەت و خودان سەربۆرێن كوردان هاتنا مێڤانێ بێ وەخت وەسا وەسف دكەن: مێڤانێ بێ دەم، خوارنا بێ خێ و بێ تامە، ئانكو ئەو مێڤاندارییا بێ پلان، تام و چێژا وێ رێزگرتنێ ژی كێم دكەت؛ چونكی خودان مال ژ روویێ دەروونی و مادی ڤە یێ بەرهەڤ نینە وەك پێدڤی پێشوازیێ ل میهڤانێ خۆ بكەت.
مال جهێ بێهنڤەدانێ و پاراستنا نهێنیێن ژیانا تایبەتە و دەما كەسەك بێ ئاگەهداری دهێت، دبیت ئەندامێن خێزانێ د حالەتەكێ دا بن كو نەڤێن چ كەسان ببینن، یان مژوولی كارەكێ پڕ ئاریشە بن و ل ڤێرێ دبێژن: هەر كەسەك ل مالا خۆ پاشایە، و دەستدرێژیكرن ل سەر ڤێ پاشایەتیێ ب رێكا هاتنا ژنشكەكێ ڤە، جۆرەكێ نەمانا رێزێ یە بەرامبەر خێزانێ.
مرۆڤێ رەوشەنبیر و تێگەهەشتی، ئەو كەسە یێ كو بەرژەوەندی و بێهنڤەدانا خەلكی دئێخیتە پێش حەزا خۆ یا سەرەدانێ و بكارئینانا ئامرازێن پەیوەندیێ بەری سەرەدانێ، نیشانا رێزگرتنێ یە نەك دووركەفتن و مێڤانێ خودان رێز ئەو كەسە یێ كو دزانیت كەنگی دهێت و كەنگی دچیت، دا كو نەبیتە بار ل سەر ملێن خەلكی، وەك مەزن دبێژن: مێڤانێ گران، ل سەر دلا بارە.
ل دووماهیێ بلا ئەم رەسەنیا خۆ بپارێزین و دەرگەهێن مە هەر یێن ڤەكری بن، لێ بلا ب تێگەهشتن و پەیوەندیێ بن و بلا سەرەدانێن مە ببنە ئەگەرێ كەیفخۆشیێ و بهێزكرنا پەیوەندیێن جڤاكی، نەك ببنە ئەگەرێ وەستیان و دلگرانیا ئێك و دو. رێزگرتن ل دەمی، رێزگرتنە ل مرۆڤی.
