مەنفەلۆتی – زەنگین و هەژار هەژاندیە
عزەت یوسف
زەنگین و هەژار، گۆتارەكە یا نڤیسكارێ بلیمەت (مستەفا لوتفی ئەلمەنفلوتی)، د پەرتووكا (النڤرات) دا ل سالا ((1910) ێ دەرچووی هاتیە، هەڤبەریەكە دناڤبەرا دو تەخێن دژبەر، هاوارەكە د رویێن دەولەمەندان دا یێن كو چاڤپۆشیێ ل پێدڤیێن هەژاران دكەن.
مەنفلوتی، نڤیسكارێ دەستهەلێ میسری ستایلەكێ بێگەرد د نڤێسینێن خوە دا هەیە. پەرتووكا وی ژ سێ بەشان پێك دهێت، كۆمەكا گۆتارێن ئەدەبێ چڤاكی، رەخنەیی، سیاسی ئیسلامی، سەرباری كۆمەكا كورتە چیرۆكان ب خوە ڤە دگریت.
نڤیسكارێ ناڤدار مەنفلوتی ب شێوازێ خوە یێ سادە و ساكار یێ ناڤدارە كو چیرۆكان ب پەیڤێن ئاسان و ئامانجدار ڤەدگێڕیت. بەری پتر ژ سەد سالان د ئێك ژ بلیمەتە نڤێسینێن خوە دا ب ناڤێ (زەنگین و هەژار) د پەرتووكا (النڤرات) دا، دبێژیت:
شڤێدی ئەز دبەر زەلامەك بەلەنگازدا بۆریم من دیت دەستێ خوە یێ دانایە سەر زكێ خوە، هەروەكو گازندا ژ ئازارەكی دكەت، بۆ رەوشا وی خەمبار بووم و من ژێ پرسی كا وی خێرە؟ گازندە ژ برساتیێ كر. ئینا من دلەدلێ وی دا. پاشی من ئەو هێلا و چووم بۆ سەرەدانا هەڤالەكێ خوە كو ئێك بوو ژ مرۆڤێن زەنگین و خودان مال و حال، ئەز حێبەتی مام دەمێ من دیتی دەستێ خوە یێ دانایە سەر زكێ خوە و ژ ئێشانێ دنالیت، مینا هەژارێ بەلەنگاز یێ گازندا ژ ئێشانێ دكەت، من ژێ پرسی كا تە چیە؟ بەرسڤا من دا كو توخمە یا هاتیێ!.
ئینا من گۆت: وەی هەوار! ئەگەر زەنگینان ئەو خوارنا ژ پێدڤیێن خوە زێدە دابانە هەژاران هیچ ژ وان گازندە ژ ئازار و نەساخیێ نەدكرن، هەژی بوو هند خارنێ ب خۆت برساتیا وی تێر بكەت و كەلا برسا وی بڤەمرینیت، لێ ئەوی ژ رادەیێ زێدەتر نەفسا خوە دڤیا، ئەوا ژ روپەلێ هەژاران دزی ل سەر سفرا خوە دانا، ئینا ژبەر ستەما وان خودێ ب تۆخمێ سزادان، داكو ستەمكار پیرۆزیێ ب ستەما خوە نەكەت و خوەشیێ ب ژیانا خوە نەبەت. وەسا ئەو پەندە راستە ئەوا دبێژیت: (توخمەیا زەنگینی تۆلڤەكرنە ژ برسا هەژاری).
