مە ل گوندی خولێن فێركرنا دهفێ و زمانێ كوردی و گۆڤهندان ڤهكرینه
خانما هونهرمهند و دهفژهن، شادی غولامی دهربارهیی كارێن خۆ یێن هونهری دبێژیت: ئهڤه دهمێ 17 سالایه ئهز كارێ هونهری دكهم و ههتا نوكه من حهفت ستران ب رهنگهكێ فهرمی تۆماركرینه، ههروهسا من ئهزموونا رێڤهبهریا گروپێن مۆزیكی ههیه و ئهز ئهنداما لژنا دادوهری بوویمه ل فیستیڤالا دهفێ دا ل باژێرێ سنه ل رۆژههلاتێ كوردستانێ، دیسا ب پشتهڤانیا ههڤژینێ خوە یێ هونهرمهند، ئهز شیایمه پێزانینێن زێدهتر ل سهر بیروباوهر و كلتوورێ كوردی پهیدا بكهم و ل سهر ڤێ رێبازێ یا بهردهوام بم.
ناڤهاتیێ گۆت ژی: بهری دهستپێكرنا ههر بهرههمهكێ هونهری، ههكه من تێكست و ئاوازا سترانهكێ بڤێت كو سهرنجا من رابكێشیت و تۆمار بكهم، ئهز كار ل سهر وی بهرههمی دكهم، ههروهسا ل رۆژههلات و باشورێ كوردستانێ مه مامۆستایێن خودان شیان د وارێ ئاوازدانانێ دا ههنه، ب دیتنا من، مۆزیك و تاما هونهری ل كوردستانێ تێكههلی خوین و مهژیێ هونهرمهندان بوویه، بكارئینانا موزیكا بیانی د ناڤ سترانێن كوردی دا، ب وێ واتایێ دهێت كو مه پێزانین ل سهر دهولهمهندیا مۆزیك و كلتوور و رهسهناتیا كوردی نینن، ههروهسا چهندین ئاواز و شێوازێن ستران و موزیكێ یێن تایبهت ب دهڤهرێن جودا یێن كوردستانێ ڤه ههنه، كو ههر ژ دهستپێكا ژهنینا وان، مرۆڤ دزانیت ئهڤه مولكێ كوردستانێ نه و ب تهمامی یێن كوردانه.
هونهرمهند شادی غولامی ل سهر رۆلێ خوە وهك ژنهكا كورد دبێژیت: راسته چالاكیێن من ل سهر ستران و موزیكێ بوون، ل گهل هندێ من بزاڤكرینه وهك نوونهرا ژنا كورد پێزانینێن خۆ زیده بكهم، ل پرانیا بهرنامهیان دا من بهحسێ مافێن ژنێ، رۆلێ وێ د جڤاكی دا و ئازادیا ژنێ كریه، من دڤێت خۆدیكهك بم بۆ جوانی و ئازادی و رهسهناتیا ژنێ، بۆڤێ مهرهمێ ژی ل رۆژههلات و باشور و باكورێ كوردستانێ من كۆنسیرتێن تایبهت ب ژنانڤه سازكرینه.
ئهو ژی گۆت: نوكه ئهز ڤهگهریایمه گوندی و من دهست ب ژیانا گوندی كریه، ئهز د ناڤ سرۆشتی دا ل گوندێ تاینهیی یێ سهر ب دهڤهرا سنه و كامیاران دژیم، ئهڤ گونده مهلبهندهكێ كلتووری و هونهریه بۆ كۆمكرنا هونهرمهندان، مه ل وێرێ خولێن فێركرنا دهفێ و زمانێ كوردی و گۆڤهندان ڤهكرینه داكو بشێین ژیانا گوندی زیندی بكهینهڤه و تامێ ژێ وهربگرین، ههروهسا پرۆژهكێ نوو ل بهر دهستێ من ههیه، ئهو ژی تۆماركرنا ئهلبوومهكا تایبهته ب ژنانڤه، ئهڤ ئهلبوومه ب تێكستێن ژنانه و ل سهر پێدڤیاتی و رۆلێ ژنێ د جڤاكی دا كار ل سهر هاتیه كرن، ل ڤان نێزیكان دێ بهلاڤ بیت.
شادی غولامی، سترانبێژ و دهفژهن، ل سالا 1993 ێ ل باژێرێ سنه ل رۆژههلاتێ كوردستانێ ژ دایك بوویه و نوكه ژی ل رۆژههلاتێ كوردستانێ دژیت.
