ناڤه‌ندا خانی چار پرتووكێن نوو چاپكرن

دهۆك، زنار تۆڤی:

ئیسماعیل بادی، ئه‌ندامێ‌ لژنا ره‌وشه‌نبیری ل ناڤه‌ندا خانی یا ره‌وشه‌نبیری و راگه‌هاندنێ‌، بۆ رۆژناما ئه‌ڤرۆ دیاركر كو ناڤه‌ندا خانی چار پرتووكێن دی چاپكرن، ژ وان ژی، پرتووكا (10) شاعرێن عه‌‌ره‌‌ب و عیراقی، كو ژ به‌‌رهه‌‌ڤكرن و وه‌‌رگێرانا ئه‌‌نوه‌‌ر محه‌‌مه‌‌د تاهری یه‌‌، كۆمه‌‌كا هۆزانێن شاعرێن ناڤدار یێن عه‌ره‌بن، وه‌‌كو (به‌‌در شاكر سه‌‌یاب، عه‌‌بدولوه‌‌هاب به‌‌یاتی، ئه‌‌دونیس، موزه‌‌فه‌‌ر نه‌‌واب، محه‌‌مه‌‌د ماغۆت، مه‌‌حموود ده‌‌روێش، نزار قه‌‌بانی، یوسف سائیغ، حه‌‌سه‌‌ب شێخ جه‌‌عفه‌‌ر و خه‌‌زعه‌‌ل ماجدی،  د ناڤ 90 به‌‌رپه‌‌راندا، چه‌‌ند هۆزانێن وان وه‌‌رگێراینه‌‌ سه‌‌ر زمانێ‌ كوردی، هه‌روه‌سا پرتووكا چارده‌‌ گولێن وه‌‌ریایی ل شنگالێ‌، نۆڤلێته‌‌كا كورته‌‌، ژ 64 به‌رپه‌ران پێكهاتییه‌‌، ل دۆر وان چارده‌‌ پێشمه‌‌رگه‌‌یێن شه‌‌هیدبوویی، كو ب كریاره‌‌كا تیرۆرستی هاتبوونه‌‌ هنگاڤتن و جانێ‌ خوه‌ ژ ده‌‌ست دایه‌، نڤیسه‌‌رێ‌ پرتووكێ‌ (شیراز چاربۆتی) شییایه‌‌ ب كورتی و ب شێوازه‌‌كێ‌ جوان، هیڤی و ئومێدێن وان شه‌‌هیدان بكه‌‌ته‌‌ نۆڤلێت و ل دووماهییا پرتووكێ‌ ژی هنده‌‌ك به‌‌لگه‌‌نامه‌ و وێنێن وان شه‌‌هیدان هه‌‌نه‌.

‌  پرتووكا بارزانییێ‌ نه‌‌مر د وێنێن هه‌‌لبه‌‌ستێدا، كۆمه‌‌كا هۆزانانه‌‌ ل دۆر كه‌‌ساتییا بارزانییێ‌ نه‌‌مر، ژ نڤێسینا هۆزانڤان عه‌‌بدولقادر ئۆرمانی یه‌، پرتووك ژ 151 به‌‌رپه‌‌ران پێكهاتییه‌‌، ل دووماهییێ‌ ژی وه‌‌كو دكیۆمێنت هنده‌‌ك وێنێن بارزانی تێدا هه‌‌نه‌‌، ل گه‌ل هۆزانان ژی، مۆنتیڤ بۆ هه‌‌ر هۆزانه‌‌كێ‌ هاتینه‌‌ چێكرن، هه‌روه‌سا پرتووكا قه‌‌له‌‌م، ژ نڤێسینا محه‌‌مه‌‌د عه‌‌بدوللا ئامێدی یه‌‌، به‌‌ری ده‌‌مه‌‌كی ناڤه‌‌ندا خانی وه‌‌كو رێزگرتن بۆ خه‌‌باتا وی و پشتی تووشی نه‌‌خۆشییه‌‌كێ‌ بوویی، رێز لێ‌ هاته‌‌ گرتن و بریار دا كو پرتووكه‌‌كێ‌ بۆ وی چاپ بكه‌‌ن، وی ژی ئه‌‌ڤ پرتووكه‌‌ هه‌‌لبژارت كو بهێته‌‌ چاپكرن، ناڤه‌‌رۆكا وێ‌ پرتووكێ‌ ل دۆر گرنگییا قه‌‌له‌‌می یه‌‌، هه‌‌روه‌‌سا قه‌‌له‌‌مه‌ك ل نك هۆزانڤانێن كورد، پاشی به‌‌حسێ‌ مه‌‌دره‌‌سێن د به‌‌رێ‌ دا ل ئامێدیێ‌ هه‌‌ین دكه‌‌ت، هه‌‌ر ژ سه‌‌رده‌‌مێ‌ میر حه‌‌سه‌‌نی و هه‌‌تا دووماهی مه‌‌دره‌‌سه‌‌ كو قوبه‌‌هانه‌‌ خواندن لێ‌ مابوو، كورتییه‌‌ك ژی ل دۆر كتێبخانه‌‌ و پرتووكان ئاخفتییه‌.

کۆمێنتا تە