نها مروڤ پتر تووشی نەخوشیێن دەروونی دبن
بێوار حەمدی:
نها زانست پتر یێ پێشكەفتی، لەوما دەستنیشان كرنا نەخوشیێن دەروونی ب ساناهیترە، دهێتە زانین كو د نوكە دا نەخوش زێدەتر لێ هاتینە ژ بەرێ، بسپورەكێ دەروونی ژی دیار كر كو خەموكی و دوو دلی ژ هەموو نەخوشیێن دەروونی بەربەلاڤترن و هەژاری ئەگەرەكێ سەرەكیە بو ڤان نەخوشیان.
ماموستایێ زانكویێ و چارەسەركارێ دەروونی، عەلی عەبدولقادر، د دیدارەكێ دا بو روژناما ئەڤرو دیاركر، بەری نوكە زانست گەلەك یێ پێشكەفتی نەبو، دەستنیشانكرنا نەخوشیێن دەروونی وەكی نوكە یا پێشكەفتی نەبو، ژبەركو نوكە زانست پتر یێ پێشكەفتی و د بەرێدا خەلكی هەر نە دزانی كو وان نەخوشیا دەروونی یا هەی و گۆت: (بەلكو دا بێژن ئەجنەك یێ د لەشێ وی دا یان یێ دین بوی، چونكی نەخوشیێن دەروونی بەرێ گەلەك كێمتر بون).
چارەسەركارێ دەروونی گوتژی: (د نوكەدا ئەو كەسێن پتر تووشی نەخوشیێن دەروونی دبن ئەون یێن كو تووشی دەربەدەریێن ژیانێ دبن وەكی، نەبونا پارەی بو كڕینا تشتا یان ژی گازندێن خێزانێ یێن بەردەوام و ئەو مروڤێن كو دناڤ جڤاكی دا دژین و كەسێ هایژ حالێ وان نەبیت).
عەلی زێدەتر گۆت: (هەژاری ئێك ژ ئەگەرێن سەرەكیە كو مروڤی تووشی نەخوشیێن دەروونی دكەت، ب تایبەت نەخوشیێن خەموكی و دوو دلیێ لدەڤ مروڤی پەیدا دكەت).
دبەردەوامیا ئاخفتنێن خودا چارەسەركارێ دەروونی دیار كر، پێدڤیە حكومەت كار ل سەر هندێ بكەت كو نەخوشخانێن دەروونی زێدە بكەت و نوژدارێن دەروونی ژی پتر لێ بهێن و سەنتەرێن باوەر پێكری هەبن، چونكی ئەڤ كەرتە یێ گرنگە و دڤێت حوكمەت ل بەرچاڤ وەربگریت و گوت: (ب دیتنا من گەلەك گرنگە هندەك بسپورێن دەروونی گرنگیێ بدەنە كارێ سوشیال میدیایێ دەربارەی نەخوشیێن دەروونی، چونكی زور جاران كەسەكی نەخوشیەكا سڤك یا هەی و هەكە ل گەل بسپورەكێ دەروونی باخڤیت ڕەنگە نەخوشیا وی مەزن نەبیت و نەگەهیتە دەروونی).
ماموستایێ زانكویێ ئەو چەندە ژی دا زانین، ژ وان رێكێن كو نەخوشیێن دەروونی سڤك دكەن یان ژناڤ دبەن ئەڤەنە پێدڤیە خەلك گەلەك مایتێكرنێ د ژیانا ئێكدو دا نەكەن و حكومەت ژی بشێت هاریكاریا خەلكی بكەت ب ڕێكا ڤەكرنا دەلیڤێن كاری و گوت: (پێدڤیە خەلك ژی سوشیال میدیایێ كێم بكار بینیت و هەر ئاریشەك و بێهن تەنگیەكا هەبیت دڤێت پرسیارا خو بكەن و چ تشتا نەهێلنە ددلێ خودا، بەلێ ب مەرجەكی ئاریشا خو بو كەسێن بسپور بێژن).
عەلی عەبدولقادر گۆت: (پێدڤیە جارەكا دی خێزان وەكی بەرێ بزڤرن و بزاڤێ بكەن هەر چ نەبیت حەفتیێ جارەكێ هەموو پێكڤە كوم ببن و خو ل ئاریشێن ئێكدو بكەنە خودان، ب سەرەدەریەكا جوان و د كەیفخوش بن ل گەل ئێكدو داكو دویر بن ژ هەموو ئاستەنگ و نەخوشیێن دەروونی).
