نه‌خوشیا ده‌روونی هه‌یه نزا شوو پێ بكه‌م یان نه؟
ئه‌ڤرۆ نيوز:
كچه‌كا زانكویێ دلێ خوه بو ئه‌ڤرۆ ڤه‌دكه‌ت و دبێژیت: ئه‌ز و كوڕ خالێ خوه حه‌ز ژ ئێكدو دكه‌ین، ئه‌و یێ بێ كاره، به‌لێ ئاریشه ئه‌وه یێ تووشی نه‌خوشیا ده‌روونی بووی، ماوه‌یكێ حه‌بك د خوارن داكو ئارام ببیت، به‌س پا یا بێ مفا بوو، له‌وما نه‌چار بو نوشدارێ خوه گوهۆری، لێ ره‌وشا وی هه‌ر نه یا باشه و یێ د سترێسێ و دودلیێ و خه‌موكیێ دا و هه‌رده‌م دبێژیت دێ خوه كوژم، نزا ئه‌ز چ بكه‌م؟ یا به‌رده‌وام بم د ڤێ په‌یوه‌ندیێ دا، هه‌روه‌سا ب دیتنا ته ئه‌ز دێ شێم هاریكاریا وی كه‌م ئه‌رێ دێ شێم ل گه‌ل وی ژیم هه‌كه من ژیانا هه‌ڤژینیێ ل گه‌ل پێك ئینا هیڤیه تو چ دبێژی رێیه چاره‌یه‌كێ بو من بێژه ؟
كچا هێژا:
ل ده‌ستپێكێ گرنگه تو خواندنا خوه ب دووماهی بینی، ژلایه‌كێ دیڤه تو دشێی هاریكاریا وی بكه‌ی و وی هان بده‌ی كو به‌رده‌وام چاره‌سه‌ریا خوه بكه‌ت و ده‌ستا نه داهێلن هه‌تا دختور ل سه‌ر نه‌خوشیا وی هه‌ل دبیت و چاره‌سه‌ر دكه‌ت.
ب دیتنا من هه‌كه خوه چاره‌سه‌ر نه‌كه‌ت ب زه‌حمه‌ت تو بشێی ژیانا خوه یا هه‌ڤژینیێ ل گه‌ل ببورینی، ژبه‌ركو ئه‌ڤه به‌رپرساتیه‌كا مه‌زنه و په‌یوه‌ندی ب حه‌زژێكرنێ ڤه نینه، ژبه‌ركو هه‌كو ژیانا هه‌ڤژینیێ پێك دئینی به‌رپرساتی دهێن، ئه‌ڤجا پێدڤیه هزرا هه‌موو تشتا بكه‌ی، ژبه‌ركو نها كوڕك یێ د حاله‌ته‌كێ نه‌باش دا و پێدڤی ب هاریكاری و چاره‌سه‌ریا نوژدارێن ده‌روونیه نه‌ك یا ته، ژبه‌رهندێ جارێ یا گرنگ ئه‌وه ئه‌و ساخله‌م ببیت و چاره‌سه‌ریا خوه بكه‌ت.
تو ژی گه‌له‌ك له‌زێ نه‌كه بو پێكئینانا ژیانا هه‌ڤژینیێ، تو دشێی ژ دوورڤه هاریكاریا وی بكه‌ی و ئاخفتنێن خوش بێژیێ و هاندانا وی بكه‌ی و نه‌هێله هزرا خوه كوشتنێ بكه‌ت، هه‌كو چاره‌سه‌ری كر هینگێ تو دێ هزرا خوه كه‌ی و بریارا خوه ده‌ی كا دێ شێی ژیانا هه‌ڤژینیێ ل گه‌ل پێك ئینی یان نه، به‌س پا نها ل گه‌ل پێك نه‌ئینه، چونكی تو نه‌شێی هاریكاریا وی بكه‌ی و ره‌نگه ئه‌و پتر نه‌خوش ببیت، چونكی نه‌شێت وه‌ك زه‌لام ئه‌ركێ خوه به‌رامبه‌ری ته بجه بینیت ژ هه‌موو لایاڤه.
به‌رسڤدان: ده‌روونناس ئاواز
گۆشا دلێ خۆ ڤه ل سه‌ر فه‌يسبۆكى