نوكە كچ پتر ژ كوڕان شیاینە دەلیڤەیێن كاری ب دەست خۆڤە بینن
ئەڤرۆ، ئەمیر ئەترووشی
كچەكا كریستیان د دیدارەكێ دا ل گەل رۆژناما ئەڤرۆ دیار كر، ب دیتنا من ل سەردەمێ نوكە كچ پتری كۆران شیایە دەلیڤێن كاری ب دەست خۆڤە بینیت و گۆت: رەوشا گەنجێن كریستیان ل هەرێما كوردستانێ تا رادەیەكی یا باشە، چونكی هەموو دەما ل خوپێشڤەبرنێ دگەرن و د ئامادەنە بۆ كاركرنێ، حوكمەتا هەرێما كوردستانێ ژی هەموو دەمان مافێ كەمینەیان پاراستیە و مافێن وان داینە ل ناڤ هەموو تەخ و جۆر و پوستێن كاری دا .ئاتور عیسی نێروەیی، كچەكا كریستیان و خەلكا دهۆكێ یە و نوكە وەكو فەرمانبەر ل پشكا پەیوەندیان ل پارێزگەها هەڤلێرێ كاردكەت د دیدارەكێ دا ل گەل رۆژناما ئەڤرۆ دیار كر، د ژیێ 15 سالیێ دا من دایكا خۆ ژ دەست دا، ئەڤە ژی بوو ئەگەر هەستێ بەرپرسیارەتی و كاركرنێ ل دەڤ من پەیدا ببیت، دا كو بشێم هاریكاریا باب و خووشك و برایێن خۆ بكەم و گۆت: من گەلەك كار كرینە و ل سالا 2009 من دەست ب كارێ خۆبەخشی ل رێكخراوێن جڤاكی مەدەنی كر، دا كو بشێم خو پێشڤەببەم، هەتا نوكە كارێ من دگەل هندەك ژ وان مایە، نوكە ژی فەرمانبەرم ل پارێزگەها هەلێرێ.
ل دور پێشڤەچوونا گەنجان ژی د ڤی سەردەمی دا ئاتورێ گۆت: هەمی دەما من گوتیە گەنجێ مە خودان شیانە و دشێت گەلەگ داهێنانا بكەت، پێدڤیە ل سەر گەنجێن مە هەموو دەما خو پێشبێخن و فێری زانست و كارێ نوو ببن، هەموو دەما دبێژم پێدڤیە وی كاری بكەی یێ ئەو حەز ژێ بكەی، دا بشێت داهێنانێ تێدا بكەت و خزمەتا وەلاتێ خۆ بكەت.
ئاتور خویاژی كر، ب دیتنا من ل سەردەمێ نوكە كچ پتر شیایە دەلیڤێن كاری ب دەست خۆڤە بینیت و گۆت: پێكئینانا خێزانێ رێكەفتنەكا هەڤپشكە دناڤبەرا كچێ و كوری دا، كچی ژی دشێت هەر وەكو بەرێ ژیانا هەڤژینی پێك بینیت بێ كو خودان كار بیت، بەلێ بارەدوخێ نوكە داخواز دكەت هەردوو لا كار بكەن دا كو بشێن ب شێوەیەكێ باش بژین.
ئاتور عیسا ئەو یەك ژی نە ڤەشارت، زانینگەه و باوەرنامە بۆ هەموو مروڤان زۆر دگرنگن، بەلێ ب دیتنا من نابیتە رێخوشكەر بۆ پێك ئینانا هەڤژینیێ، بەلێ مەرجەكێ سەرەكیە بۆ ب دەسڤە ئینانا كاری، مە رێژەكا باش ژ گەنجێن بەرهەمدار هەنە كو شیاینە كارێن مەزن بكەن، بەلێ هێشتا كێمە، پێدڤیە هەموو گەنج ب ئاستەكێ باش خۆ پێشبێخن دا پتر بشێن خزمەتا وەلاتێ خۆ بكەین.
ئاماژە ب وێ یەكێ ژی كر، نوكە ئەم د باردوخەكێ خراب یێ ژیانێ دبەینە سەر، ل شوونا گەنجێن مە كێشا خۆ چارەسەر بكەن بۆ دەستڤەئینانا دەلیڤێن كاری، پەنایێ دبەنە كافیتیریا و دەمێ خۆ ب هەروە بوورینن، ئەو دەمێ هندە بهایێ خوە هەی، یێ ژ دەستێ مە دچیت، پێدڤیە گەنج ڤی دەمێ پڕ بها بۆ خواندن و خۆپێشخستن و خزمەتكرنێ ب مەزێخن.
ئاتور نە ڤەشارت ژی، ژنا كوردستانێ ژ كەڤن یا بەرنیاسە كو ب هێز و سەنگە، بهایێ مروڤی ب مروڤیڤە هاتیە گرێدان، بەلێ هەمی دەما دبێژم مرۆڤ نەشێت هەموو مرۆڤان رازی بكەت، لەورا بۆ خۆ بژی و گۆت: رەوشا گەنجێن كریستیان ل هەرێما كوردستانێ تا رادەیەكی یا باشە، چونكی هەموو دەما ل خوپێشڤەبرنێ دگەرن و د ئامادەنە بۆ كاركرنێ، حوكمەتا هەرێما كوردستانێ ژی هەموو دەمان مافێ كەمینەیان پاراستیە و مافێن وان داینە ل ناڤ هەموو تەخ و جۆر و پوستێن كاری دا.
