نیوار داود:یانا شێلادزێ ده‌مێ پێدڤی بۆ راهێنانان نه‌بوویه
ئه‌ڤرۆ، نه‌وزاد هلۆری:
د دیداره‌كا تایبه‌ت دا راهێنه‌رێ تیما ته‌پا پێی یا یانا شێلادزێ دیاركر تیما وی ده‌مێ پێدڤی به‌ر ده‌ست نه‌بویه بۆ ئه‌نجامدانا راهێنانان به‌ری ب كه‌ڤنه د ناڤ هه‌ڤركیێن خولا پله دو یا كوردستانێ دا لێ ئاستێ تیمێ یاری به‌ره ب باشتر د چیت.
زێده‌تر نیوار داود ئه‌وێ بۆ رۆژناما ئه‌ڤرۆ گۆت: یاریا ئێكێ ئاستێ یاریزانێن شێلادزێ زۆر یێ باش بوو لێ د یاریا دویێ دا وه‌كو پێدڤی نه هاته ئه‌نجامدان ژبه‌ركو یانا دینارته شیانێن وان باشتر بوون و چه‌ندین ساله هاتیه دامه‌زراندن كو سه‌ربۆر هه‌بوویه و پێشتر ل پله ئێك پشكداری كریه، لێ ل گه‌ل ڤێ یه‌كێ یاریزانێن مه ژی ئاسته‌كێ باش نیشان دا و شیاین هه‌موو وان خالان ده‌ستنیشان بكه‌ین كو یاریزان كه‌فتینه تێدا ب تایبه‌تی گولپارێزی و هێلا به‌ره‌ڤانیێ و ئه‌ڤ یه‌ك بویه ئه‌گه‌ر كو تیما به‌رامبه‌ر بخوه مفایی ژێ كێماتیێ وه‌ربگرن و گۆلا سه‌ركه‌فتنێ تۆماربكه‌ن.
زێده‌تر ناڤهاتی گۆت: یانا شێلادزێ یانه‌یه‌كا نوو یه و ده‌مێ پێدڤی نه‌بویه بو ئه‌نجامدانا راهێنانێن باش و ژێگرتن و به‌رهه‌ڤكرنا یاریزانێن پێدڤی، نوكه نێزیكێ 25 یاریزانێن باش به‌ر ده‌ستێ مه‌نه و كار ل سه‌ر راهێنانێن به‌رده‌وام دكه‌ین داكو بشێن د یاریێن بهێت دا ئاسته‌كێ باشتر و ئه‌نجامێن سه‌ركه‌فتی پێشكێش بكه‌ین.