نێزیكی پێنج هزار سترانێن كوردی هاتینه دزین و كرینه توركی
زنار تۆڤی:
ل دووڤ ئه‌نجامێن لیكۆلینه‌كا به‌رفره‌ه یا مۆزیكی، دیار بوویه كو چار هزار و 971 سترانێن فۆلكلۆر و ره‌سه‌ن یێن كوردی بێ مۆله‌ت و ب شێوه‌كێ نه‌یاسایی كرینه توركی و وه‌ك به‌رهه‌مێن توركی هاتینه ناساندن.
ئه د لیكۆلینه ژلایێ لیكۆله‌ر و موزیكژه‌نێ كورد “وه‌یسی ڤارلی” ڤه هاتیه ئه‌نجامدان، پتر ژ 28 هزار سترانێن كوردی ئێخستینه ژێر پشكنین و هه‌ڤبه‌ركرنه‌كا هوور، د ئه‌نجام دا دیار بوویه كو ژ وێ هژمارێ چار هزار و 971 ستران ب نه‌ره‌وا و نه‌یاسایی هاتینه ده‌ستكاریكرن و میلۆدی و تێكستێن وان كرینه توركی، كو ئه‌ڤه ژی وه‌ك “دزینا هونه‌ری دهێته هژمارتن.
وه‌یسی ڤارلی، ده‌رباره‌یی لیكۆلینا خۆ ئاماژه ب وی چه‌ندێ كر: ژبه‌ر وان گڤاشتن، سته‌م و قه‌ده‌غه‌كرنا دیرۆكی یا ل سه‌ر زمان و چاندا كوردی هه‌یی، به‌رهه‌مێن هونه‌ری یێن كوردی وه‌ك “ماله‌كا تالانكری” كه‌فتینه به‌ر دزینێ، ئه‌ڤه ژی بوویه سه‌ده‌م كو هونه‌ر و كه‌له‌پۆرێ ده‌وله‌مه‌ند یێ كوردی رووبروو هه‌لویسته‌كێ ره‌گه‌زپه‌رستانه، یێ ب ڤی ره‌نگی بیت.
وه‌یسی ڤارلی د ژییێ 68 سالیێ دایه و ژ سالا 1988 ێ ڤه یێ به‌رده‌وامه ل سه‌ر ڤێ لیكۆلینێ، ناڤبری پێشتر د ناڤبه‌را سالێن 1972 هه‌تا 1988 مژوولی كارێ موزیكژه‌نیێ بوویه و ل گه‌ل هه‌ر ئێك ژ هونه‌رمه‌ندان دلگه‌ش و براده‌ر و د ناڤ گرۆپێ “كۆما ده‌نگێ شۆره‌شێ” دا كار كرییه، به‌لێ ل دووماهییێ ده‌ست ژ كارێ ژه‌نینێ به‌ردایه و وه‌ك شاره‌زایه‌ك د وارێ موزیكۆلۆجی، ژییێ خوە بۆ ب به‌لگه‌كرنا وان سترانێن كوردی ته‌رخان كرییه یێن كو كرینه توركی.
ناڤهاتی گۆتییه ژی: زێده‌باری هه‌موو بزاڤێن دزینا سترانێن كوردی تالانكرن و شێلیكرنا ده‌ق و ئاوازێن ره‌سه‌ن، موزیكا كوردی شیایه زیندی بمینیت و وه‌ك كه‌لهه‌كا خۆرستی شیایه چاند و ناسناما گه‌لێ كورد ب پارێزیت.
