نێزیكی 30 ملیار دیناران بۆ پڕۆژەیێن باتیفا هاتینە تەرخانكرن
گوهدار شێخۆ، سەرپەرشتێ ئیدارەیا سەربخوە یا زاخۆ د كۆنگرەیەكێ ڕۆژنامەڤانی دا ل ناوچەداریا باتیفا دیار كر كو هەتا نوكە نێزیكی 30 ملیار دیناران بۆ پڕۆژەیێن جۆراوجۆر یێن ناوچەداریا باتیفا هاتینە تەرخانكرن.
سەرپەرشتێ ئیدارەیا سەربخوە یا زاخۆ گۆت: «بەهرا پتریا ڤان پڕۆژەیان ب دووماهی هاتینە و كەفتینە د خزمەتا خەلكێ دەڤەرێ دا، ئێك ژ وان پڕۆژەیێن گرنگ دروستكرنا نەخوەشخانەیا باتیفایە، كو هەموو بزاڤ دهێنە كرن ب زووترین دەم، ئەڤ نەخوەشخانە ب دووماهی بهێت، داكو ب هەلكەفتا سالڤەگەڕا ئیدارەیا سەربخوە یا زاخۆ بهێتە ڤەكرن».
گۆت ژی: «ئێك ژ بابەتێن دی یێن گرنگ ل ناوچەداریا باتیفا ژینگەها ڤێ دەڤەرێ یە، ئەڤە وەرزێ گەشتیاری هات و گەشتیار دێ سەرەدانا ڤێ دەڤەرێ كەن، لەوما پاقژڕاگرتنا ژینگەهێ یا گرنگە، دیسا هەموو بزاڤ دهێنە كرن، پڕۆژەیێن گەشتیاری ب زووترین دەم ب دوومای بهێن و بكەڤنە د خزمەتا وەلاتی و گەشتیارێن دەڤەرێ دا».
