نێچیرڤان بارزانی: پێدڤیه ب وێره‌كی پێداچوونێ د بریارێن خوه یێن بۆری دا بكه‌ین
ئه‌ڤرۆ:
نێچیرڤان بارزانی، سه‌رۆكێ هه‌رێما كوردستانێ دوهی ئێكشه‌مبی 19/9/2021 د گۆتاره‌كێ دا ل كۆنفرانسێ په‌روه‌رده‌یێ یێ زانكۆیا ئه‌مریكی كوردستان ل دهۆكێ راگه‌هاند” سیسته‌مێ په‌روه‌رده و خواندنێ ل هه‌رێمێ هه‌ر ژ باخچێ ساڤه‌یان هه‌تا خواندنا بلند پێدڤی ب پێداچوونه‌كا جدی و ریشه‌یی هه‌یه، هه‌روه‌سا وی سیسته‌می پێدڤی ب باشتركرن و چاكسازیێ یا هه‌ی، كو ل گه‌ل پیڤه‌رێن زانستی و ستانداردێن جیهانا ئه‌ڤرۆ یا په‌روه‌ردێ و خواندنێ بگونجیت”.
سه‌رۆكێ هه‌رێمێ گۆت ژی” زانست و ته‌كنه‌لۆژیا هنده بله‌ز پێشدكه‌ڤن، هه‌كه بزاڤێ نه‌كه‌ین ل گه‌ل بچین، دێ د جهێ خوه‌دا مینین، هه‌ر ئه‌و پێشكه‌فتنه ژی، چه‌مك و بها و تێگه‌هشتنێن نوو ل گه‌ل خوه دا دئینن، ره‌وشا ئابووری و جڤاكی و سیاسی یا نوو دروست دكه‌ت”.
دیاركر” یا رۆهنه كو ئه‌م ئێدی نه‌شێین و نابیت ده‌ست ب شێواز و میتۆدێ كه‌ڤن یێ په‌روه‌ردێ و فێركرنێ بگرین و ل سه‌ر به‌رده‌وام بین، هندی زووتر ده‌ست ب چاكسازیێ د سیسته‌مێ په‌روه‌ردێ دا بكه‌ین، دێ زووتر گه‌هینه كاروانێ جڤاكێن پێشكه‌فتی ل جیهانێ”.
نێچیرڤان بارزانی نموونا هندستانێ ئینا و گۆت” وه‌لاته‌كێ وه‌كو هندستانێ بۆ نموونه سه‌ره‌رای دیرۆكه‌كا درێژ یا هێرشێن ده‌ره‌كی و پارچه‌بوون و كێم درامه‌تی و هه‌ژاری و زۆریا هه‌ژمارا ئاكنجیان، پشتی چه‌ند سالێن تاقیكرن و ڤه‌كۆلین و هه‌لسه‌نگاندنا به‌رده‌وام، گاڤێن گه‌له‌ك مه‌زن هاڤێتن و نوكه كێم كۆمپانیێن جیهانی یێن هه‌ین كو شاره‌زا و بسپۆرێن هندی تێدا نه‌بن، ئه‌گه‌رێ سه‌ره‌كی یێ ده‌ستپێكرنا وێ سه‌ركه‌فتنێ ئه‌نجامدانا گوهۆرینێن بنه‌ره‌تی و سه‌رده‌میانه د سیسته‌مێ په‌روه‌ردێ دابوو ل هه‌موو ئاست و قۆناغان دا، حوكمه‌تا هندستانێ ب هاریكاریا نێڤده‌وله‌تی و كادرێ خۆمالی و هه‌ماهه‌نگی ل گه‌ل لایه‌ن و ئاستێن پێدڤی، پرۆسا باشتركرنێ و چاكسازیێ كره مۆركێ سه‌رهلدانا شیانێن وه‌لاتێ خوه، هه‌مان پرۆسه ل كوریا باشوور، سه‌نگاپوور، چین، فینلاند، ئوردن و رواندا و چه‌ندین وه‌لاتێن دی یا دووباره بووی”.
زێده‌تر گۆت” لێك فێربوون و ئالۆگۆریا بیر و پرۆگرامان، نوكه گه‌له‌ك ژ جاران ب ساناهیتره، ئه‌م دێ شێین چ ژ وان ئه‌زموونان فێربین و مفای ژێ وه‌رگرین؟ چاوان بێخینه د خزمه‌تا چاكسازیێ د بوارێ په‌روه‌ردێ دا ل كوردستانێ؟ پێدڤیه بێ ترس و راشكاوانه پێداچوونێ د بریارێن خوه یێن نوو و كه‌ڤن دا بكه‌ین و بێخینه بن تیشكا ڤه‌كۆلینا ئه‌كادیمی و زانستی، تاكو هاریكاریا مه بكه‌ت و تێبگه‌هین ل كیرێ مه شكه‌ستن ئینایه و ل كیرێ سه‌ركه‌فتینه، ئه‌ڤ جۆره هزركرنێ په‌روه‌رده‌یا نوو دڤێت، له‌وما چاكسازی د بوارێ په‌روه‌ردێ و خواندنێ دا ل سه‌ر هه‌موو ئاسته‌كی دێ بۆمه ئه‌نجامێن راست و دروست ده‌سته‌به‌ر كه‌ت”.
