نەتەوەیێن ئێکگرتی سەبارەت ب سووریێ بڕیارەکا گرنگ ددەت
نەتەوەیێن ئێکگرتی بریار دا لیژنەیەکا تایبەت بهێتە دروستکرن و کار ل سەر دیارکرنا چارەنڤیسێ وان کەسان بهێتە کرن یێن کو د ئەنجاما شەرێ ١٢ سالێن بۆری دا ل سووریێ بەرزە نە و هەتا نها چارەنڤیسێ وان کەسان دیار نینە، چاڤدێرەکێ سیاسی یێ کورد ژی دیار دکەت ئەو یەک بۆ کوردان ل سووریێ گەلەک باشە.
نەتەوەیێن ئێکگرتی راگەهاند وان بریار داینە لیژنەیەکا تایبەت کار ل سەر ئاشکراکرنا چارەنڤیسێ وان کەسان بکەت یێن کو د دەمێ ١٢ سالێن بۆری دا ژ بەر شەڕی ل سووریێ هەتا نها چارەنڤیسێ وان دیار نینە، گەلەک ژ وان کەسان د زیندانێن سووریێ دانە و دەستهەلاتا سووریێ دڤێت راستیا وان کەسان ئاشکرا بکەت، هەروەسا ئەو دەڤەرێن کو ل ژێر دەستهەلاتا گرۆپێن چەکدار دانە دڤێت رێ بهێتە دان دا لیژنا تایبەت یا سەر ب نەتەوەیێن ئێکگرتی کارێ خوە بکەت.
د ڤێ دەربارێ دا هۆزان عەفرینی چاڤدێرێ سیاسی یێ رۆژئاڤایێ کوردستانێ راگەهاند، د ئەنجاما شەڕی ١٢ سالێن بۆری دا ل سووریێ هەتا نها چارەنڤیسێ ب هزاران کەسان دیار نینە، گەلەک ژ وان کوردن، هندەک رەنگە د زیندانێن سووریێ دا بن، لێ هەتا نها چارەنڤیسێ ب هزاران کەسان دیار نینە، کەس نزانیت کا د ژیانێ دا ماینە یان نە؟ ژ بەر هندێ ژی بریارا نەتەوەیێن ئێکگرتی بۆ سووریێ و ب تایبەتی ژی بۆ کوردان گەلەک گرنگە، چونکی هەتا نها ب هزاران وەلاتیێن رۆژئاڤایێ کوردستانێ ژی بەرزە نە، کەس نزانیت کا کیڤە نە؟ هەکە د ژیانێ دا مابن وی دەمی دڤێت چارەنڤیسێ وان بهێتە ئاشکرا کرن و گۆت: (بێگومان دڤێت رژێما سووریێ هاریکاریا لیژنا تایبەت یا نەتەوەیێن ئێکگرتی بکەت، چونکی هەر کەس دزانیت د دەمێ ١٢ سالێن بۆری دا رژێما سووریێ ژی ژ بۆ مانا خوە ل سەر دەستهەلاتێ گەلەک تاوانێن مەزن ئەنجام داینە، ب هزاران چالاکڤان هەتا نها ژی د زیندانێن سووریێ دانە و رژێما سووریێ ژی چارەنڤیسێ وان کەسان بۆ رایا گشتی و خێزانێن وان ئاشکرا نەکرینە، ژ بەر هندێ ژی گەلەک گرنگە رژێما سووریێ و گرۆپێن چەکدار رێزێ ل بریارا نەتەوەیێن ئێکگرتی بگرن و هاریکاریا لیژنا تایبەت یا نەتەوەیێن ئێكگرتی بکەن دا چارەنڤیسێ گەلەک وەلاتیێن سووریێ بهێتە ئاشکرا کرن).
ئەو یەک د دەمەکێ دایە کو بەری نها ژی چەندین جاران رێکخستنا مافێن مرۆڤی یا سەر ب نەتەوەیێن ئێکگرتی ڤە دیار کربوو، چارەنڤیسێ ب هزاران وەلاتیێن سووریێ د ئەنجاما شەڕی ١٢ سالێن بۆری دا دیار نینە و دڤێت هەم شام و هەم ژی گرۆپێن چەکدار هاریکاریا لیژنێن تایبەت یێن سەر ب نەتەوەیێن ئێکگرتی ڤە بکەن دا ئەو بشێن چارەنڤیسێ وان کەسان ئاشکرا بکەن.
