نەخۆشخانا هەوارهاتنا بەردەڕەشێ ب گوژمێ سـێ ملیار دیناران هاتـە ڤەكرن
لەزگین جوقی:
ب بەرهەڤبوونا د. سامان بەرزنجی، وەزیرێ ساخلەمیێ ل حوكمەتا هەرێما كوردستانێ و د. عەلی تەتەر، پارێزگارێ دهۆكێ و ئیسماعیل مستەفا، دەڤەردارێ بەردەڕەشێ و د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ و د. مەردان خدر، بەرپرسێ لقێ نەهێ پارتی ل ئاكرێ و هەژمارەكا رێڤەبەرێن میری و خەلكێ دەڤەرێ، نەخۆشخانا هەوارهاتنێ یا 25 تەختی ل دەڤەرداریا بەردەڕەشێ هاتە ڤەكرن.
د. سامان بەرزنجی، وەزیرێ ساخلەمیێ ل حوكمەتا هەرێما كوردستانێ د پەیڤەكێ دا دیار كر، جهێ خوشحالیێ یە ئەڤرۆكە نەخۆشخانا هەوارهاتنێ ل دەڤەرداریا بەردەڕەشێ یا 25 تەختی ب هەمی پێدڤیێن نۆشداری و ئامیرەیێن نوو د وارێ ساخلەمیێ دا هاتە ڤەكرن و گۆت: «سوپاسیا سەرۆكێ حوكمەتا هەرێما كوردستانێ دكەین، بۆ پشتەڤانیا وی یا بەردەوام ل كەرتێ ساخلەمیێ، بۆ هەمی دەڤەران بێ جوداهی، هەروەسا دەستخۆشیێ ل رێڤەبەرێ گشتی یێ ساخلەمیا دهۆكێ و دەڤەرداێ بەردەڕەشێ دكەم، رۆلەكێ بەرچاڤ هەبووینە هەر ژ دەسپێكێ هەتا ئەڤرۆ نەخۆشخانە هاتیە ڤەكرن، چەندین پڕۆژەیێن مەزنتر بۆ ڤێ دەڤەرێ مە هەنە».
د. عەلی تەتەر، پارێزگارێ دهۆكێ د پەیڤا خۆ دا گۆت: «جهێ خۆشحالیێ یە كێمتر ژ حەفتیەكێ یە مە بەرێ بنیاتی بۆ ٥٥ پڕۆژەیان ل دەڤەرداریا بەردەڕەشێ دانابوو، نوكە ژی ئەڤ نەخۆشخانا هەوارهاتنێ یا پێشكەفتی هاتە ڤەكرن و كەفتە د خزمەتا خەلكێ ڤێ دەڤەرێ دا، كاروانێ ئاڤادانیێ یێ بەردەوامە ل هەمی دەڤەران و چ دەڤەر ناهێنە پشتگوه هاڤێتن، د سەرەدانێن سەرۆكێ حوكمەتێ دا بۆ پارێزگەها دهۆكێ پێدڤیێن كارگێری ب مەرەما خزمەتكرنێ هاتینە چارەسەركرن، هەژمارەكا پڕۆژەیێن مەزن بۆ خزمەتكرنا ڤێ دەڤەرێ د رێدانە».
پارێزگارێ دهۆكێ سوپاسیا رێڤەبەرێ گشتی یێ ساخلەمیا پارێزگەها دهۆكێ كر د پێشكێشكرنا خزمەتێن ساخلەمیێ دا ل بەردەڕەشێ، نەخۆشخانا هەوارهاتنێ یا 25 تەختی ل بەردەڕەشێ ب گوژمێ سێ ملیار و 884 ملیۆن دیناران هاتیە ئاڤاكرن و ژ ڤان پشكان پێك دهێت: (شیرەتكاری، پشكا تەنگاڤیا، هولێن نشتەرگەریان، پشكا تاقیگەهـێ، پشكا تیشكێ، درەمانخانە، كارگەها ئوكسجینی و رەدهە) هەمی پێدڤیێن نۆشداری ل گەل ئامیرەیان بۆ هاتینە دابینكرن.
