نەشێم گەلەرییا کەڤالێن خوە یێن مۆدرن نیشابدەم
عەیشا عەجیب:
فەھمی بالایی، ھونەرمەندێ شێوەکار د دیدارەکێ دا بۆ ڕۆژنامەیا ئەڤرۆ بەحس ل پرۆژەیێ خوە یێ نوی و خزمەتا وی بۆ ھونەرێ کوردی کر و گۆت: دەمەکێ درێژە من چ پێشانگەھ ڤەنەکرینە، لێ نوکە پرۆژەیەک من ھەیە (٤٥) کەڤال د ئامادەنە، چەند جھان داخواز ژ من کرینە ڤەکەم لێ ھێش من بڕیار نەدایە، ھەتا بینەرێ کەڤالان نەبیت نەشێم ڤی پرۆژەی ڤەکەم.
ناڤھاتی گۆت ژی: ل سەڕانسەری ئورۆپا تایبەت ئەلمانیا بینەرەك و ڕەشەنبیریەکا باش یێ کەڤالی ھەیە و گرنگیێ ددەنە پێشانگەھان، لێ ئەز نابینم مە ئەو بینەر ھەبیت، ھەتا نڤیسەر و ڕەوشەنبیرێ مە د ھونەری ناگەھیت یان ژی گەلەک گرنگیێ نادەت، خەلکێ مە یێ ب ھوزان و سترانێ ڤە مژوولە، ھونەرێ شێوەکاری، سینەما، شانۆ و ئەڤ لایەنە ژبیرکری، ھەر جڤاکەکێ دووری نە تێگەھشتنا ھونەری بیت یان ژی ئەو ھەست نەبن بەرانبەر ھونەرێ جڤاکەکێ پاشڤەماییە.
ناڤهاتی گۆت ژی: ئاستێ شێوەکارییێ دەڤەرا بەهدینان گەلەک باشە، ژ لایێ دامودەزگەھێن حکومی، ھونەری، ڕەوشەنبیری و بینەری ڤە گرنگی پێ ناھێتە دان، ئەگەر ئەڤ ھونەرمەندە پشتگێرییا وان بھێتەکرن، ب دیتنا من ھونەرمەندێن گەلەک ژ ھەژی دشێن کارێن باش کەن، ھەروەسا ئەڤە چل سالن ئەز خزمەتا ھونەرێ کوردی دکەم، من سەر ئاستێ جیھانێ گەلەک پێشانگەھ ڤەکرینە، ئێک ژ پڕۆژەیێن مە ڤەکرنا پەیمانگەھا ھونەرێ جوان دھۆکێ ل گەل چەند ھەڤالێن ھونەرمەند و مە پڕۆژەیەک چێکرییە دناڤبەرا ئەوروپا و کوردستانێ دا و ب دەھان پێشانگەھێن تایبەت، سەدان پێشانگەھێن ب کۆم، گۆتار و ٩ پەرتۆک ل سەر ھونەرێ شێوەکارییێ،..ھتد، لێ ھەتا نوکە ئەگەر ئەز وەک ھونەرمەندەک نەھاتیمە نیاسین، ژ ڤێرێ وێڤە ژی ئەز باوەرناکەم ئەو بھایێ ھونەری ھەبیتن، ئەو کارێ من کری پێش چاڤ بھێتە وەرگرتن، تێرا ھندێ دکەت شورەشا ھونەرێ چل سالان ھاتینەکرن، لێ ئەز بەردەوامییێ دەمە کارێ خۆ، د نوکەدا ھەمی بوویە بەرژەوەندی و پەیوەندی، لەوڕا ئەز حەزژ وان تشتا ناکەم سەر حسێبا ھونەرێ خۆ و کەسایەتییا خۆ ڤان تشتا بکەم.
زێدەتر گۆت ژی: گەلەک دھێن و دبێژن تۆ یێ دووری ژ خێزانا خوە، هەلبەست و کەڤال وەک پرەکێنە هەڤژینا من هیڤی بەرواری هەلبەستڤانە و ئەز شێوەکار ئەو ل ئورۆپا و ئەز ل کوردستانێ ئەم د ھەستێن ئێک دگەھین لەوما هونەر و شیعر پرەکن مە دگەهینن ئێک ھندەک جارا مرۆڤ ل غەریبیێ و ھندەک جارا مرۆڤ وەلاتێ خۆ ھەست ب غەریبیێ دکەتن، بەلێ ئەو غەریبی بیتە پالدەرەک مرۆڤ پتر ئافراندنێ د نڤێسینا ھونەری دا بکەت، وەکی پرەکێ دناڤبەرا من و دووراتیا خێزانامندا. ژ بەر ھندێ تابلۆیێن من بووینە دو بەش ھندەک کۆچبەر بووین چووینە ئەوروپا و ھندەک ژی ئەوروپا ڤەگەریاینە وەلاتی دناڤبەرا ھەردوو جیھاندا تابلۆ مە دگەھینتە ئێک، وەکی ھاتییە دیارکرن تابلۆ ھەلبەستەکا بێدەنگە و ھەلبەست تابلۆیەکا بێدەنگە، تەمامکەرێن ئێک دوونە ڤێ دووراتیێ دکۆژیت ھەڤالەکێ نێزیکە بۆ من.
ناڤھاتی دیار ژی کر: ھونەرمەند پێدڤییە نەکەڤیتە بەر کارتێکرنا چ ھزرێن بەرتەنگ، ژ بەر کو ھونەرمەندان گەلەک شورەش و سەرھلدان کرینە و ڕێساس چێکرینە ل ئەورۆپا، پێدڤییە ھونەرمەندێن مە خودان ھەلویست بن، نە کو پێشانگەھەك بھێتە دائێخستن بن کارتێکرنێن ھزری، ئولی، مەزھەبی، سیاسی یێن ھەر لایەنەکێ، یا من دڤێت بێژم ھونەرمەند ناما خوە یا پیرۆز بگەھینت، ژ بەرکو خزمەتا نەتەوا و نشتیمان و گەلێ خوە مرۆڤایەتیێ دکەتن، پێدڤییە چ مەترسیەک نەبیتن و ئازادبن و پشتەڤانی بۆ ھەبیت.
