هاريكاريا وه‌به‌رهێنه‌ر و وه‌به‌رهێنانێ دكه‌ين
ئه‌ڤرۆ نيوز:
ب چاڤدێرى و ئاماده‌بوونا مه‌سرۆر بارزانى سه‌رۆكێ حوكمه‌تا هه‌رێما كوردستانێ، ئه‌ڤرۆ رۆژا دوشه‌مبى 30ى ئيلۆنا 2019ێ پێشانگه‌ها 13ێ يا هه‌مه‌جۆر يا بازرگانيا نێڤده‌وله‌تى ل پێشانگه‌ها نێڤده‌وله‌تى يا هه‌ولێر هاته ڤه‌كرن.
مه‌سرۆر بارزانى سه‌رۆكێ حوكمه‌تا هه‌رێما كوردستانێ ل گه‌ل ڤه‌كرنا پێشانگه‌هێ راگه‌هاند: “مه د به‌رنامێ كارێ حوكمه‌تێ دا، گرنگيه‌كا زۆر دايه پێشخستنا ئابوورێ كوردستانێ، هێڤيدارم ئه‌ڤ پێشانگه‌هه ببيته ده‌ستپێكه‌كا باشتر بۆ تێكه‌لبوونا بازرگانى و وه‌به‌رهێنان و خاوه‌نكاران ل هه‌رێما كوردستانێ و ده‌رڤه، دا كو ئه‌م ب تنێ پشت ب ژێده‌رێن داهاتى نه‌به‌ستين، به‌رنامێ مه ئه‌وه گرنگيه‌كا ته‌مام ب كه‌رتێ ئابوورى بده‌ين”.
سه‌رۆكێ حوكمه‌تا هه‌رێما كوردستانێ راگه‌هاند ژى كو ئه‌وا دشيانێن وان دا بيت بۆ وه‌به‌رهێنه‌ر و بازرگانان درێغيێ ناكه‌ن، بزاڤێ دكه‌ن د پرۆسا بكارخستنا كۆمپانيان ل هه‌رێما كوردستانێ ئاسانكاريان بۆ بكه‌ن و هاريكاريا وان بكه‌ن.
بۆ ئه‌ڤ ساله 300 كۆمپانى ژ 22 وه‌لاتێن جودا د پشكدارن و بۆ ماوێ چار رۆژان دێ يا به‌رده‌وام بيت.
