هانا و شەنگ دێ هەڤڕكیێ بۆ كۆپا دێڤێز یا نێڤدەولەتی كەن
هەردو كچێن پارێزگەهێ و یانەیا دهۆك بۆ یارییا تێنسا ئەردی شەنگ عەبدولغەنی و هانا ئاڤدەل ب ناڤێ هەلبژارتیێ ئیراقێ دێ پشكداریێ د قارەمانییا دێڤێز كاپ یا نێڤدەولەتی دا كەن ئەوا دهێتە چاڤەڕێ كرن هەڤڕكیێن وێ ل 12 هەتا 25ێ ڤێ مەهێ بۆ هەردو ئاستێن كوڕان و كچان ب پشكدارییا 23ی وەلاتان ل سیریلانكا بهێتە ئەنجامدان.
ل دۆر ڤێ یەكێ ئاڤدەل حەسەن راهێنەرێ تیما یانەیا دهۆك و هەلبژارتیێ ئیراقێ بۆ رۆژنامەیا ئەڤرۆ گۆت: ب شانازی ڤە دو كچە یاریزانێن مە شیاینە جهێ خوە د ناڤ رێزێن هەلبژارتیێ ئیراقێ دا پارێزن و بەر ب ئێك ژ مەزنترین قارەمانییا نێڤدەولەتی ل كێشوەرێ ئاسیا بچن، ئەو ژی شەنگ عەبدولغەنی بۆ ژیێ 14 سالی ئەوا دوهی ب ڕێكەڤتی و هانا ئاڤدەل بۆ ژیێ 16 سالی كو دێ پشكداری قارەمانییا دێڤێز كاپ یا نێڤدەولەتی بن ل وەلاتێ سیریلانكا كەن پشتی ب سەركەفتیانە كەمپێ خوە یێ راهێنانێ یێ نافخوە ب دووماهی ئینایی.
هەروەسان ناڤهاتی گۆت: یاریزان شەنگ عەبدولغەنی دوهی بەر ب وەلاتێ سیریلانگا چوو و بڕیارە ل12ڤێ مەهێ ب كەڤیتە د ناڤ هەڤڕكیێن قارەمانیێ دا ل سەر ئاستێ 14ی سالیێ دا، دهێتە چاڤەڕێكرن حەفتییا بهێت هانا ئاڤدەل حەسەن بۆ ئاستێ 16 سالی دگەل هەلبژارتیێ ئیراقێ بەر ب هەمان وەلات بچیت ل 18ێ ڤێ مەهێ دەست ب هەڤڕكیێن قارەمانیێ بكەت، هەرچەندە ئەركێ وان ب سانەهی نابیت لێ یا گرنگ بوو مە پشكدارییەكا سەركەفتی بیت ژلایێ وەرگرتنا شارەزاهیێ و مفا وەرگرتن ژ ئاست و شیانێن یاریزانێن دی و گەشبینن دێ گەهنە ئارمانجا خوە.
