هشكباوه‌رى د دینى ب تنێ دا نینه
دیرۆكا هشكباوه‌ری یان توندره‌وى (تگرف )ێ یاكو ئه‌ڤرۆ بوویه مژارێ گه‌رمێ جیهانێ، تایبه‌ت ته‌خا بژاره (نخبه المپقفین) دیرۆكه‌ك كه‌ڤنار هه‌یه و دبت بزڤڕته ده‌ستپێكا په‌یدابوونا شه‌هره‌واریێ به‌ریا 5ـ6 هزار سالان ل جه‌م سۆمه‌ریان، لێ هشكباوه‌رى ب شێوه‌یه‌ك رێخستى دبت ل گه‌ل گه‌رمبوونا هه‌ڤركیا دینان په‌یداببت كو هه‌ر دینه‌ك دینێ خوه باشتر ژ یێن دن دبینت.
د چه‌رخێ 21 دا ڤێ هشكباوه‌ریێ پێشكه‌ڤتنێن به‌رچاڤ ب خوه‌ڤه دیتن و مفا ب شێوه‌یه‌ك نه‌رێنى ژ شۆڕشا ته‌كنولۆژى وه‌رگرت، وه‌ك چه‌كه‌ك نوو بۆ لێدانا هه‌ڤڕكان، تایبه‌ت ئیسلاما رادیكال، گه‌له‌ك مفا ژ بوو ده‌ستڤه‌ئینانا ئارمانجێن خوه ژ ئالاڤێن ڤێ شۆڕشێ دیتیه و به‌رده‌وامه.
رامان ژ گۆتنا من ئه‌و نینه كو تنێ توندره‌وى د ده‌ینان دا به‌ربه‌لاڤه، دبت مه‌به‌ستا من بهتر ئه‌وه كو توندره‌وى د ناڤ هه‌مى جۆرێن كۆم و رێخستنێن مرۆڤان دا په‌یدا دبت، چ نه‌ته‌وه و نقش بن یان هۆز و ئه‌شیر بن یان مالبات و بابك بن… هتد. گرنگ هه‌تا نهاژى ل سه‌رانسه‌رى جیهانێ ئه‌ڤ ره‌فتارا دژواریێ په‌یدا دكه‌ت ب رێژه به‌رده‌وامه و ل گه‌له‌ك جهان گه‌هشتیه گوپیتكا وێرانكاریێ و به‌رژه‌وه‌ندیێن ده‌وله‌تان و بزاڤێن هه‌یمه‌نێ ل سه‌ر ده‌ڤه‌رێن دى بهتر ئاگرێ وێ هشكباوه‌ریێ خوه‌ش دكه‌ن و بهتر خه‌لكێ وان ده‌ڤه‌ران دبن قوربان.
راسته ل رۆژئاڤا ئه‌نجامێ گه‌شه‌كرنا هزرى و پێگیرى ب سیسته‌مێ دیمۆكراسیێ و جڤاكێ مه‌ده‌نى، ئه‌ڤ ره‌فتاره به‌ره‌ڤ كێمبوونێیه و گه‌هشتیه وى رادده‌ى كو سه‌رۆكه‌ك چه‌رمره‌ش مینا (باراك ئۆباما)ى د دیرۆكا ئه‌مریكایێ دا ببیته سه‌رۆكێ 44 یێ وێ ده‌وله‌تا زلهێزا جیهانى، لێ هیشتا مایه.
ئه‌ڤجا هه‌كه ره‌گه‌زپه‌رێسى و هشكباوه‌رى ل جه‌م رۆژئاڤا و وه‌لاتێن دن یێن پێشكه‌ڤتى ب داوى نه‌هاتبت، ڤێجا خودێ هاریكارێ وه‌لاتێن جیهانا سێیێ بت كو پتر هزرا دینێ لسه‌ر وان خوه دسه‌پینت، كه‌نگى دێ ژ ڤێ ساخله‌تا نه‌رێنى ئازادبن؟!
كوردستان ئێك ژ وان وه‌لاتانه، نها نه تنێ هشكباوه‌ریا دینى تنێ ئاسته‌نگه كو كوردستان پێشنه‌كه‌ڤت و نه‌بته ده‌وله‌ته‌ك مه‌ده‌نى، ئێك ژ فاكته‌رێن ڤێ گیرۆبوونێ ئه‌ڤ توندره‌وه‌یه یه كو بوویه ره‌وشه‌نبیریا خه‌لكێ وێ كو ده‌ڤه‌ره‌ك قه‌بوول ناكه‌ت كه‌سه‌ك ده‌ڤه‌را هه‌ڤڕك نوونه‌ریا ده‌ڤه‌رێن دن بكه‌ت ره‌نگه سه‌ربخوه‌یه‌كێ وه‌ربگرن.
هه‌ر ئه‌ڤ جۆره هشكباوه‌ریه‌یه كو هه‌تا نوكه سه‌ركرده‌یێن ده‌ڤه‌را (سۆران) قه‌بوول نه‌كن ژ ئالیێ ده‌ڤه‌را (به‌هدینان) ڤه پێنگاڤه‌ك بۆ ئازادیێ و سه‌رخوه‌بوونێ بهێت هاڤێژتن. هه‌ر وه‌سا ده‌ڤه‌را (به‌هدینان) ژى ب كێماسى دبینت كو سه‌ربه‌خوه‌یا كوردستانێ ل سه‌ر ده‌ستێ ده‌ڤه‌را (سۆران) بت و داویێ قه‌بوول نه‌كه‌ت. ڤێ هشكباوه‌ریێ ژ بلى گیرۆبوونا راگه‌هه‌ندنا ده‌وله‌تا كوردى و گه‌شه كرنا دژواریێ گه‌له‌ك قه‌یران په‌یداكرینه، ل سه‌رێ لیستێ قه‌یرانا داریى و هه‌ڤركى د گه‌رمه‌گه‌رما خوه‌دایه. واته په‌یدابوونا ڤان قه‌یرانان د كاكلا خوه دا ئه‌گه‌رێ هشكباوه‌ریا ده‌ڤه‌ركییه كو چو ئالیان نه‌ڤێت ده‌ڤه‌را دى حوكمى ل هه‌رێمی بكت، ئه‌ڤجا هه‌موو ئالى هه‌ڤپشكن كو ڤان قه‌یرانان د ده‌ڤه‌ره‌كا دو ئیداره‌یى دا په‌یدا بكه‌ن و دوماهیێ هه‌ر خه‌لك ببت زیانبه‌خشێ مه‌زن و دبن ئێخسیرێن ڤێ هه‌ڤركیا كه‌ڤنه‌نوو و شیانێن خوه رزگاركرنێ؛ وه‌ك هه‌ر جار دهێلنه ب هیڤیا خودێ و فاكته‌رێن ده‌رانیڤه.
