هشیار شه‌هباز: دێ كێماسیێن تیما خوه چاره‌سه‌ر كه‌ین
عەلی حاجی:
د داخویانیەکێ دا سکرتێرێ یانه‌یا زاخۆ یا وەرزشی بۆ رۆژنامەیا ئەڤرۆ دیار کر وان دڤێت هندەک گوهۆڕینان دناڤ تیمێ دا بکەن ب تایبەتی د هێلا پێشیا تیمێ دا و وان پلانەکا باش دانایە.
زێدەتر هشیار شەهباز گۆت: ژبۆ ڤەگوهاستنێن زڤستانی وەکو دەستەیا کارگێریا یانەیا زاخۆ مە پلانەکا رێک و پێک دانایە بۆ هندێ ئەم هەتا چار یاریزانان بیننە دناڤ تیما خوە دا و چاڤدێریەکا باش ژی ل سەر وان یاریزانان دهێتە کرن، ڕەنگە یاریزانەک هەتا دو یاریزانێن پێشەکار دێ ل تیما خوە زێدە کەین و بریار د دەستێ ڕاهێنەری دایە کو کیش یاریزانی دێ ژ تیمێ دوورئێخیت، زێدەباری یاریزانێن پێشەکار ژی مە چاڤ ل ئینانا دو یاریزانێن ب رەگەز ئێراقی یە کو ژ یاریزانێن سوپەرن و دێ شێن هێزه‌كا باش دناڤ تیمێ دا دروست بکەن.
ناڤبری گۆت ژی: ئەم یێ د دانوستاندنێ دا دگەل یاریزانێ ئیراقێ ئەحمەد یاسین و هێشتا بابەتێ وی ئێکلا نەبوویە هەتا کو ئەو خولا ئەو یاریزانە تێدا یاریێ دکەت ب دوماهی دهێت د وی دەمی دا دێ پاشەرۆژا وی دیار بیت.
ب دووماهی هاتنا یاریێن گه‌ڕا نه‌هێ هه‌لوه‌ستێ یانه‌یێن كوردستانی بڤی ڕه‌نگی یه. زاخۆ 16 خال سه‌رێ لیستێ دهێت، ئه‌وا یانه‌یا ئه‌لنه‌فت 16 خال رێزا دویێ، یانه‌یا هه‌ولێرب 15 خالان رێزا چارێ دهێت، یانه‌یا نه‌ورۆز ب ئه‌نجامدانا حه‌فت یارییان ب هه‌شت خالان رێزا 16ێ دهێت، یانه‌یا دهۆك ب ئه‌نجامدانا شه‌ش یارییان ژپێنج خالان رێزا 18ێ دهێت.
