هـەڤپەیمانیا د نـاڤبەرا نـەوەی نـوێ و ئێكەتـیێ دا، گـەلـەك پرسیار ل سـەر ئـاستێ جـەمـاوەری پەیداكرینە
دلـۆڤـان ئـاكـرەیـی
پێكئینانا حوكمەتا نوو یا هەرێما كوردستانێ د قووناغەكا گەلەك ئالۆز و هەستیار یا سیاسی و ئابووری دا دەربازدبیت، كو ئەڤ پرۆسەیە ب تەمامی كەفتیە د بن باندۆرا كۆمەكا ستراتیژیەتێن حزبی، هەڤپەیمانیێن نەدیار و ئالنگاریێن قانوونی و جەماوەری دا و د ڤێ قووناغێ دا، پرۆسەیا پێكئینانا حوكمەتێ پێدڤی ب گۆتارەكا نیشتمانی یا بەرپرس هەیە، كو تێدا بەرژەوەندیێن بلند یێن گەلی بكەڤنە پێش بەرژەوەندیێن حزبی یێن تەكتیكی، چونكو ئەڤە تاقیكرنەڤەیا هەرە مەزن یا دیموكراسیێ و مانەڤەیا كیانێ هەرێمێ بخوەیە، ئەڤ چەندە ژی ب ڕاگرتنا هەڤسەنگیێ د ناڤبەرا رێزگرتن ل دەنگێ پرانی و پشكداریكرنا هەمی ئالیان دا دچەسپێت.
د نوكە دا چەندین ئالنگاریێن سەرەكی بەرامبەر پێكئینانا حوكمەتێ دهێنە دیتن، كو ل سەرووی هەمیان قەیرانا باوەریێ و نەبوونا وێ یە و د ناڤبەرا هێزێن سەرەكی دا دهێت، ئەوا كو خواستا وەرگرتنا پۆستێن بلند و دابەشكرنا دەسەڵاتێ كریە دوشوارترین گرێ ل سەر مێزا دانوستاندنان، هەڤتایێ ڤێ قەیرانێ، هەبوونا باندۆرێن دەرەكی و دەستێوەردانێن هەرێمی و نێڤدەوڵەتی هەمان دەم وەك فاكتەرەكێ فشارێ بووینە بۆ ئاراستەكرنا شێوازێ ڕێككەفتنان و د لایەكێ دی دا، پرسا مانەڤەیا هێزێن پێشمەرگەی ب نە ئێكگرتی و نەڤەگەراندنا داهاتێن ناڤخۆیی، ب تایبەت ژ لایێ زۆنا كەسك ڤە بۆ خەزینەیا حوكمەتێ، شیانێن دامەزراندنا حوكمەتەكا بهێز و مەركەزی گەلەك كێم كرینە و ل سەر ئاستێ ناڤخۆیی ژی، گوهنەدان و رێزنەگرتن ل دەنگێ دەنگدەری فاكتەرەكێ دی یێ ل هەنبەر ئاڤانەبوونا كابینەیا نوویە، چونكو ڕێژەیا كورسیان كو پرەنسیپێ سەرەكی یێ دیموكراسیێ یە، پێدڤی دكەت قەبارێ هەر هێزەكا سیاسی د كابینەیا نوو دا رەنگڤەدانا راستەقینە یا دەنگ و كورسیێن وێ حزبێ بیت د پەرلەمانی دا، و پێكئینانا پێكهاتەیا حوكمەتێ ل سەر بنەمایێ شەرعیەتا جەماوەری بیت، نەكو دابەشكرنا فیستیڤالانە یا پۆستان ب سەر هێزێن دۆڕاو یان بچووك دا، چونكو هەر جۆرە پێشێلكاریەك ل دژی ڤی پرەنسیپی، دێ بیتە ئەگەرێ پاشەكشەیا پتر یا وەلاتیان ژ پرۆسەیا سیاسی د پاشەڕۆژێ دا.
جودا ژ ڤان ئاستەنگان، ئێك ژ رووداوێن پێشهات د گۆڕەپانا سیاسی دا، نێزیكبوون یان هەڤپەیمانیا ناڤبەرا نەوەی نوێ و ئێكەتی نیشتمانی یە، ئەوا كو گەلەك نیشانێن پرسیارێ ل سەر ئاستێ جەماوەری دروست كرینە، چونكو لایەنێ نەوەی نوێ ساڵانەكە خوە وەك جێگرێ دەسەڵاتێ و ئۆپۆزسیۆنەكا توند ل دژی پارتێن دەستهەلاتدار ددەتە نیاسین، بەلێ نێزیكبوونا وان ژ ئێكەتیێ، ژ لایێ دەنگدەران ڤە وەك پاشەكشە ژ پرەنسیپان و سەردابرنەكا سیاسی هاتیە دیتن بۆ دەستكەفتێن حزبی یێن بەرتەنگ، بەڵكو ئەڤ جۆرە هەڤپەیمانییە بتنێ كۆدەنگیەكا دەمكی و تەكتیكی تێدا دهێتە دیتن بۆ لاوازكرنا پێگەیێ پارتی، نەك ل سەر بنەمایێ بەرنامەكێ چاكسازی یێ راستەقینە، كو ئەڤە ژی دبیتە ئەگەرێ تێكچوونا هەڤسەنگیا هێزێ ب شێوازەكێ نەسرۆشتی و د حالەتێ گەهشتنا دانوستاندنان ب بنبەستێ سیاسی ژی دا، چەمكێ هەلبژارتنێن بەری دەمی دبیتە مژارەكا گەرم و وەك ئامرازێ گوشارێ و رێكەكا لاوەكی بۆ چارەسەیا ڤێ گرێیێ ژ لایێ لایەنێن ناكۆك ڤە دوبارە دهێتە پێش دا كو د روونشتنان دا سازشێ ژ ئێكودو بگرن، هەر چەندە دوبارەكرنا هەلبژارتنان د كورتە ماوەكێ دا ب بێ گوهۆڕینێن قانوونی و كارگێڕی، چ چارەسەریان بەرهەم ناهینیت، بەلكو دێ قەیرانێ كوورتر لێ كەت و بارگرانیەكا ئابووری یا مەزن بۆ سەر ملێن هەرێمێ دروست كەت.
بەرانبەر ڤان هەمی پێشهاتان، د نوكە دا پارتی دیموكراتی كوردستان بریار دایە كو نەخشە، رێكەڤتن و پێشهات ل سەر بنەمایێ ئەنجامێن هەلبژارتنان بهێنە سەرراستكرن، ب شێوازەكێ كو هەر حزب و ئالیەك ل دویڤ دەنگ و قەبارێ خۆ یێ راستەقینە ماف و پشك د حوكمەتا نوو دا هەبن و ل سەر ڤی بنەمایی، پارتی پێشوازیێ ل كۆمبوونێن دوئالی دكەت دگەل هەر لایەنەكێ سیاسی ب جودا، ب مەرجەكێ كو كێش و سەنگا وان یا كورسیان د پەرلەمانی دا پیڤەرێ سەرەكی بیت، نەك داخوازێن مەزنتر ژ قەبارێ وان یێ ڕاستەقینە و ژ لایەكێ دی ڤە، پارتی ب توندی دژایەتیا وێ چەندێ دكەت كو نەوەی نوێ و ئێكەتی یان هەر هێزەكا دی وەك بەرەیەكێ ئێكگرتی یان هەڤپەیمانیەكا سەپاندی بهێنە سەر مێزا گۆتۆبێژان، چونكو پارتی د ڤێ باوەریێ دایە كو ئەڤ بەرەیە بتنێ بۆ پاشەكشەپێكرن ب مافێن وێ یێن یاسایی یێن سەركەفتنێ هاتیە دروستكرن، لەورا ب هشیاری ڤە رەفتارێ دگەل لایەنان دكەت وەك قەوارێن جودا و سەربەخۆ، دا كو ب ڤێ چەندێ رێ ل مۆنۆپۆلكرنا بریارا سیاسی د پاشەڕۆژا هەرێمێ دا بگریت.
