هنده‌ك ئافره‌ت د پێنج رۆژان دا دبنه شۆفێر و هنده‌ك ژی ب ده‌ه رۆژان فێرنابن
دهۆك، شاكر ئه‌تروشی:
هێلین عه‌لی یونس، خانمه‌كا خه‌لكا دهۆكێ یه، شاره‌زایه‌كا باش دوارێ شۆفێریێ دا هه‌یه و د دو سالێن بۆری هژماره‌كا زۆرا كچ و ژنان ل سه‌ر ده‌ستێ وێ فێری هاژۆتنا ترۆمبێلێ بووینه و حه‌ز ناكه‌ت ل پاشه‌رۆژێ نڤیسینگه‌ها تایبه‌ت بۆ خوه ڤه‌كه‌ت.
هێلینێ بۆ ئه‌ڤرۆ گۆت: به‌ری حه‌فت سالان ل مال ب ترۆمبێلا بابێ خوه من خوه فێری هاژۆتنا ترۆمبێلێ كر، دووڤدا ئه‌ز چوومه نڤیسینگه‌ها سه‌رهات و من پشكداری د خوله‌كا فێركرنێ دا كر و خودانێ وێ (هاشم مسته‌فا) كو ب مخابنی ڤه نوكه دژیانێ دا نه‌مایه وی گه‌له‌ك هاریكاریا من كر و پشتی خول ب دووماهی هاتی وی گۆته من ژبه‌ركو تر شۆفێره‌كا باشی ئه‌ز حه‌زدكه‌م تۆ ل گه‌ل مه كاربكه‌ی و ببیه راهێنه‌ر ئافره‌تان فێرێ شۆفێریێ بكه‌ی، ئه‌ز رازی بووم و هه‌ر ژوێ رۆژێ ده‌ست بكاربووم و هه‌تا نوكه یا به‌رده‌وامم، ب راستی وه‌ك ژماره من نه‌ڤێت بێژم كا چه‌ند كچ و ژن من فێری هاژۆتنا ترۆمبێلێ كرینه، لێ هژمارا وان گه‌له‌كن، بۆ زانین ده‌مێ دهێنه ده‌ف مه ئه‌م خوله‌كا ده‌ه رۆژی بۆ ڤه دكه‌ین، هنده‌ك ژوان د پێنج رۆژان دا یان پتر فێری شۆفێریێ دبن و هنده‌ك ژی ب ده‌ه رۆژان فێرنابن و جاره‌كا دی خولا خوه دوباره دكه‌ن، لێ یێن هوسا گه‌له‌ك دكێمن.
هه‌روه‌سا گۆت: گه‌له‌ك دایك هاتینه و پشتی فێری شۆفێریێ بووین كچێن خوه ژی ئیناینه و نوكه پتریا وان وه‌ك هه‌ڤال ل گه‌ل من ماینه و هنده‌ك جاران بۆ پرسیارێن شۆفێریێ په‌یوه‌ندیێ ب من دكه‌ن، و هه‌رده‌م شیره‌تا من بۆ وان ئه‌وه پێگیریێ ب رێنمایێن هاتن و چوونێ بكه‌ن دا گیانێ وان هه‌روه‌سا ترۆمبێلا وان ژی یا ب سلامه‌ت بیت و سوپاس بۆ مالا من، ب تایبه‌ت هه‌ڤژینێ من (ئه‌مین) كو پشته‌ڤانێن بهێزن بۆ من و گه‌له‌ك كه‌س هه‌بووینه گۆتینه مه دێ ژلایێ مادی ڤه هاریكاریا ته كه‌ین بۆ خوه نڤیسنگه‌هه‌كا تایبه‌ت ڤه‌كه، لێ ئه‌ز رازی نه‌بوویمه و ئه‌و چه‌نده من ره‌تكریه، چنكو ل نڤیسینگه‌ها ئه‌ز لێ كاردكه‌م گه‌له‌كا ئارام و دلخۆشم.
