هندەك كێشەیێن هەڤژینان بەری بگەهنە دادگەهێ لدەف مە چارە دبن
شاكر ئەتروشی:
رۆلەكێ باش د چارەكرنا ئاریشێن جڤاكی دا ب تایبەت یێن دناڤبەرا هەڤژینان دا هەیە و ب گۆتنا وێ گەلەك ئاریشێن هەڤژینان بەری بگەهنە دادگەهێ ل مالا وێ هاتینە چارە كرن.
مریەم حەسەن مستەفا، بەرپرسا رێكخراوا ئافرەتان ل دەڤەرا بجیلێ د دیدارەكێ دا بۆ رۆژناما ئەڤرۆ دیار كر هێشتا هندەك رەوشت و تیتال لڤێ دەڤەرێ ماینە كو رێگرن ل هەمبەر پێشڤەچوونا مافێ ئافرەتێ، هەرچەندە نوكە گەلەگ باشترە و گۆت: (لێ من قوربانی دا و ژ خوە دەستپێكر، یا ئێكێ بۆ نمونە هەتا بەری چەند سالان ل دەڤەرا مە شەرم بوو ژن ل گەل زەلامێ خوە ل سنگێ ترۆمبێلێ دا ب روینیت و دڤێت ل پشتێ روونشتبا، لەورا من ئەو قەیدە شكاند و ئەز ل سنگێ ترۆمبێلێ ل گەل هەڤژینێ خوە روونشتم، وی دەمی گەلەك رەخنە و ئاخفتن دەرحەقێ مندا هاتنە گۆتن، لێ من گوه نەدایێ).
مریەمێ د بەردەوامیا ئاخفتنێن خۆدا گۆت: (هەروەسا دەمێ ل دووماهیا سالێن نوتا هەلبژارتنێن جڤاتا باژێرڤانیان هاتنە كرن ئەز ئێكەم ژن بووم ل دەڤەرێ خوە هەلبژارتی و شیام بێ ركابەر بۆ دەمێ بیست و ئێك سالان ببمە ئەنداما جڤاتا باژێرڤانیا بجیل).
مریەمێ ئەو چەندە ژی گۆت: (شیام د گەلەك بواران دا خزمەتا دەڤەرا خوە بكەم و ئەڤ چەندە بۆ من جهێ شانازیێ یە، هەروەسا بۆ دەمێ یازدە سالان ئەز بەرپرسا ناوچا ئافرەتان بووم ل بجیل و نوكە ژی رۆژانە كچ و ژنێن دەڤەرێ یان ب رێیا تەلەفۆنێ، یانژی ب رێیا هاتتا مال ئاریشە و كێشێن خوە دگەهیننە مە بەری بچنە دادگەهێ بۆ چارە دكەین).
بەرپرسا رێكخراوا ئافرەتان گۆتژی: (دووماهی كێشا من چارە كری بەری دەمەكی ژن و مێرەك ژێكڤە بوون و بڕیارا دادگەهێ ژی دەركەفت بوو، لێ پشتی من زانی ئەز جودا دگەل هەردویان ئاخفتم و من پێك ئینان و جارەكا دی ل دادگەهێ ل هەڤدۆ هاتنە مارەكرن).
