ههرێما كوردستانێ ب 25 ملیار دۆلاران بازرگانیێ ل گهل وهلاتان دكهت
ههرێما كوردستانێ گهشبۆنهكا مهزن یا ئابووری بخۆڤه دیتیه و حۆكمهتا ههرێمێ بهردهوام مفای ژ كۆمهلگههێن نیڤدهولهتی وهردگریت. چالاكیێن ئابووری بهرفرههدكهت و بوویه ئهگهر رۆلهكێ مهزن ببینیت ژ بۆ راكێشانا وهبهرهێنهرێن بیانی و كۆمپانیێن كهرتێ گشتی دناڤا كوردستانێدا وهبهرهێنانێ بكهن.
ههولێر، سولین سلێمان
شێخ مستهفا عبدهولرهحمان سهرۆكێ هاورده و هنارتنێ ل كوردستانێ بۆ رۆژناما ئهڤرۆ دیاركر، بازرگانیا ههرێما كوردستانێ دگهل وهلاتێن بیانی بهرفرههـ بوویه، نۆكه ل كوردستانێ كارێ بازرگانیێ و هاوردهكرنێ د رهوشهكا زۆر باشدایه، ههموو مهرزه د ڤهكرینه ژ بۆ هاوردهكرنا ههموو جۆره كهلوپهلان.
خویاكر، قهبارێ بازرگانیا ههرێما كوردستانێ دگهل وان وهلاتا نێزیكی 25 ملیار دولارن و پتریا وێ دگهل وهلاتێ توركیا و ئیرانێڤه دهێته ئهنجام دان.
ئاشكرا ژی كر، گهلهك وهلاتێن وهكی ئهمریكا و ئهوروپا و وهلاتێن عهرهبی ههرێما كوردستانێ ژ بۆ ئهنجامدانا بازرگانیا خوه ههلدبژێرن و ڤێ چهندێ ژی ژ بۆ مه ههردوو لایهنا مفایهكێ زۆر باش ههیه، نۆكه زێدهتر ب دههان وهلاتان بازرگانیێ د كوردستانێدا دكهن، ب تایبهت ههردوو وهلاتێن توركیا و ئیران بازرگانیێ د ناڤبهرا كوردستانێ و وان ههردوو وهلاتان د ئاستهكێ زۆر باشدایه و ل ئیرانێ ئهڤ ساله قهبارێ بازرگانیێ 10 ملیار دۆلار بوون و یا توركیا ژی قهبارێ بازرگانیێ نێزیكی 11 ملیار دولاران بوویه و وهلاتێن دی ژه ههر ئێك ب قهبارهیهكی بازرگانیێ ل گهل ههرێما كوردستانێ دكهت.