هه‌ر گڤاشتنه‌كا لسه‌ر ژنا دوگیان هه‌بیت دێ كاریگه‌ریێ كه‌ته سه‌ر زارۆكی
هه‌ولێر، قائید میرۆ
شاره‌زایه‌كێ ده‌روونی هۆشداریێ دده‌ت لدۆر په‌روه‌رده‌كرنا زارۆكان و ئاشكراكر، ده‌مێ زارۆك هێشتا نه‌هاتیه سه‌ر دنیایێ پێدڤیه سه‌ره‌ده‌ریه‌كا باش دگه‌لدا بهێته‌كرن، چونكه گوره‌ی ڤه‌كۆلینێن هاتینه‌كرن هه‌ر روویدانه‌كا بسه‌ر ژنا دوگیان بهێت دێ كاریگه‌ری لسه‌ر زارۆكی په‌یداكه‌ت هه‌روه‌سا دبێژیت، نابیت به‌ری ته‌مه‌نێ شه‌ش سالیێ زارۆك ئامیرێن زیره‌ك و مۆبایل و ئایپاتێ بكاربینیت.
ته‌نیا به‌دره‌دین، شاره‌زایێ ده‌روونی بۆ رۆژناما ئه‌ڤرۆ دیاركر”زانست رێكێ ناده‌ن به‌ری ته‌مه‌نێ شه‌ش سالیێ ئایپات و مۆبایلێ بده‌نه ده‌ست زارۆكان، تنێ گوره‌ی ساخله‌میا جیهانێ پشتی ته‌مه‌نێ شه‌ش سالیێ تنێ بۆ ده‌مێ ئێك ده‌مژمێر ئامیرێن وه‌ك ئایپات و مۆبایل بده‌نه زارۆكان، واته ده‌مژمێره‌كێ نه‌بۆریت، چونكه زارۆك دێ چینه ناڤا جیهانه‌كێ ئه‌و جیهانا زارۆك ب رێیا ئه‌ڤان ئامیران دبینیت جوداهیه‌كا مه‌زن دگه‌ل ژیانا رۆژانه‌یا زارۆكی هه‌یه، زارۆكی پێدڤی ب به‌رسیڤدانێ هه‌یه، به‌لێ ده‌مێ دبینه ته‌ماشه‌ڤانێ ته‌له‌فزیۆن و ئامیرێن ئه‌لكترۆنی و ئایپات و مۆبایلێ به‌رسیڤاوی ناهێته‌دان، ژبه‌ركو جیهانه‌كا جودایه و وه‌ك ژیانا زیندی نینه گه‌ل ئێكی پاخڤیت و به‌رسیڤێ وه‌ر بگریت، زۆر جارا ده‌مێ زارۆك مژۆلی ته‌له‌فزیۆن و ئامیرێن ئه‌لكترۆنیه ده‌مێ دایك و باب گازی زارۆكی دكه‌ن به‌رسیڤێ ناده‌ت، چونكه ئه‌و كه‌فتیه ناڤا جیهانه‌كادی و تنێ گوهدار و ته‌ماشه‌ڤانه، زارۆك هه‌موو تشه‌كی ل ده‌وروبه‌رێن خۆ وه‌ر دگریت، زارۆك ژ دایك و بابان فێری ئاخفتن دبیت و فێری مامه‌له‌یێن رۆژانه دبیت ده‌مێ دایك و باب ده‌لیڤێ ده‌نه زارۆكی به‌ر ته‌له‌فزیۆنێ و مژۆلی بكار ئینانا مۆبایلێ بیت ئه‌ڤه دێ ئه‌ڤان تشتا فێربیت یێن ب رێیا وان ئامیران دبینن نه‌ك دایك و بابا.
ته‌نیا به‌دره‌دین گۆتژی” ڤه‌كۆلینان ئه‌فچه‌نده پشتڕاستكریه زارۆك به‌ری بهێته سه‌ر دنیایێ كاریگه‌ری لسه‌ر هه‌نه، ئه‌گه‌ر بهێت و دایك تووشی هه‌ر روویدانه‌كێ ببیت ئه‌ڤه دێ كاریگه‌ریێ كه‌ته سه‌ر زارۆكی دناڤا زكێ دایكێ دا، زۆر جاران دهێته گوتن ده‌مێ ژن یا دووگیان بیت تنێ پێدڤیه هنده‌ك جۆرێن خوارنێ بخۆت و بن چاڤدێریا نۆشداران بیت، به‌رۆڤاژی پێدڤیه ژنا دو گیان به‌ری هه‌رتشته‌كی د ره‌وشه‌كا سه‌قاگیردا بژیت و گڤاشتن لسه‌ر نه‌بن، زۆر حاله‌ت هه‌نه دده‌مێ دو گیانیێ ژن تووشی خه‌مۆكیێ دبن یان تووشی ئاریشه و نه‌خۆشیێن ده‌روونی دبن، له‌وڕا یا فه‌ره بهێنه چاره‌سه‌ركرن و به‌رۆڤاژی چاره‌سه‌ری بۆ نه‌هێته‌كرن راسته‌وخۆ دێ كاریگه‌ریان كه‌ته سه‌ر زارۆكی، هه‌ر گه‌ف و كاریگه‌ریه‌كا خراپ لسه‌ر ژنا دوگیان هه‌بیت دێ زارۆكژی تووشی ئاریشه‌یان بیت ناڤا زكێ دایكێ دا، ئه‌ركه بشێوه‌یه‌كێ زانستی و ساخله‌م سه‌ره‌ده‌ری دگه‌ل ژنا دوگیان بهێته‌كرن و نابیت ژنێن دوگیان بكه‌ڤنه بن هیچ گڤاشتنه‌كا ده‌روونی، ئه‌گه‌ر بهێت و ژنا دوگیان ژیانه‌كا ئاسایی ده‌ربازكر ئه‌ڤه دێ زارۆكه‌كێ ساخله‌می ژی هێته به‌رهه‌م.
