هه‌لبژارتن و سنۆرێ كوردان
ئه‌ڤ هه‌لبژارتنێن پارلامه‌نتۆیا توركیا ب راستی ژی تشته‌ك ده‌رخست هۆلێ كو كورد ل توركیا ب سه‌رێ خوه نه. یانی ئه‌و كه‌سێن كو د ٧ێ خزیرانێ دا پشته‌ڤانیا كوردان كر و ده‌نگێ خوه دا HDP مخابن ڤێ جارێ ده‌نگێ خوه نه‌دا HDP. ل سه‌ر ڤێ مژارێ مرۆڤ دكاره د گه‌له‌ك به‌شان دا نیقاش بكه. لێ ئه‌و نیقاشێ هه‌ری گرنگ ئه‌وه كو د ئه‌وقاس بن زۆرده‌ستیا ده‌وله‌تا ترك دا HDP ژ به‌ندا % ١٠ ده‌رباس بوو، ئه‌ڤ ژی سه‌ركه‌فتنه‌ك مه‌زنه ژ بۆ HDP. یانی بێ پشته‌ڤانیا تركا HDP ل توركیا ب ته‌ڤاهی ده‌نگێ خوه ژ % ١٠ سه‌ند. سه‌لاهه‌تتین ده‌میرتاش و رێ هه‌ڤالێن وی ب راستی ژی كه‌ده‌ك مه‌زن دان ژ بۆ هه‌لبژارتنێ. ل سه‌ر وان ئێریش پێك هات، هاتن بنچاڤكرن، هاتن كوشتن و مخابن هاتن بۆمبه‌كرن. لێ دیسا ژی ئه‌و د ڤێ هه‌لبژارتنێ دا ب سه‌ركه‌تن. ئارمانجا AKP ئه‌و بوو كو HDP د بن به‌ندێ دا بمینه. ب راستی ژی ئه‌و هه‌ژمارا كو AKP د هه‌لبژارتنێ دا ب ده‌ست خست هه‌ژماره‌ك گه‌له‌ك بلند بوو. یانی تو كه‌سێ هێڤی نه‌دكر كو AKP ئه‌وقاس ده‌نگ بستینه. یا راستی ئه‌و بوو كو رێخستنا AKP ژی باوه‌ر نه‌دكر. ل سه‌ر ڤێ مژارێ ئه‌ز باوه‌رم وێ د رۆژێ پێشیا مه دا ل سه‌ر ڤێ مژارێ هنه‌ك ئاگاهیێن دن ده‌ركه‌ڤن هۆلێ.
ئه‌ز دخوازم ره‌خنه‌یێ خوه ل سه‌ر كێمكرنا ده‌نگێن HDP به‌رده‌وام بكم. گه‌لۆ چما HDP ده‌نگێن وێ كێم بوون؟ ب راستی ژی ل گۆر ٧ێ خزیرانێ گه‌له‌ك بابه‌ت هه‌نه كو ل سه‌ر ڤێ مژارێ مرۆڤ دكاره باخڤه. لێ ئه‌و بابه‌تێن هه‌ری گرنگ ئه‌وه كو ترك د مژارا كورد و مافێن كوردان دا پشته‌ڤانیا HDP نه‌كر. یا دن ژی ئه‌وه كو PKK ب چالاكیێن خوه‌یێ به‌رسڤدایینا ئارتێشێ ترك و ئه‌و ئیلانكرنا خوه‌سه‌ریا باژاران نه د جیه دا بوو. ئان ژی نه د ڤێ وه‌ختێ دا پێوست بوو! یان كو هات كوشتن HDP،ێ كو هات بنچاڤكرن HDP،ێ كو نكاربوو ده‌ركه‌ڤه ته‌له‌ڤیزیۆنا HDP،ێ كو ناڤه‌ندێ وێ هاتن بۆمبه‌كرن HDP… مرۆڤ دكاره گه‌له‌ك درێژ بكه ڤان بوویه‌را. لێ مخابن هه‌ر تشت ل ئالیكی شه‌رێ د ناڤبه‌را پۆلیسان و گێنجێن باكوور دا یانی ده‌وله‌تا ترك و PKK دا هات هۆلێ چاڤێن ده‌نگدێرێن تركا تاری كر. تركا هه‌موو مافێن HDP ژ بیر كرن و ل گۆر ئارمانجا ئه‌ردۆگان هه‌ره‌كه‌ت كرن. بالكێشه كو ئه‌و كه‌سێن د ٧ێ خزیرانێ دا ده‌نگ نه‌دا بوو AKP ڤێ جارێ ب ته‌ڤاهی ده‌نگ دان AKP. د ده خویاكرن كو پۆلیتیقایێن ئه‌ردۆگان ب سه‌ركه‌تن. مخابن HDP نكاربوو پۆلیتیقایێن خوه بینه زمان و ده‌رفه‌تێ وان ژی نه‌ما بوو. هه‌ر ده‌ری گرتی بوو ژ بۆ HDP و ده‌وله‌ت ب هێزه‌ك مه‌زن رێیا HDP قوت دكر. به‌لێ راسته وسانه. لێ مخابن نه ب ته‌نێ ده‌وله‌ت PKK ژی ل سه‌ر مژارا خوه‌سه‌ریا ده‌مۆكراتیك و كۆلانا خه‌نده‌قا رێیا HDP قووت كر! ل باكوور ده‌نگێن HDP تشته‌ك هندك كێم بوو. لێ مخابن ل باژارێ توركیا گه‌له‌ك ده‌نگ وندا بوون. من د نڤیسێ خوه‌یێ پشتی هه‌لبژارتنێ دا ئانی بوو زمان كو “PKK د سێنیا زیڤ دا سه‌رۆكاتیی دا ئه‌ردۆگان. “
HDP ل سه‌ركه‌فتنا باكوورێ كوردستان تشته‌ك جوودا ژی ده‌رخست هۆلێ. ده‌وله‌تا ترك چقاس ئێریش بكه و چقاس بنچاڤكرنا پێك بینه ژی ئه‌و سینۆرێ باكوورێ كوردستان وێ د ده‌ستێ كوردا دا به. ئه‌ڤ ژ بۆ سبێرۆژا كوردا تشته‌ك گرینگه.
ئه‌ردۆگان ب ڤێ سه‌ركه‌فتنا خوه وێ پۆلیتیقایێن خوه‌یێ ل سه‌ر رۆژاڤا بدۆمینه و ب راستی ژی ژ بۆ كوردان ئه‌ڤ تشته‌ك باش نینه. مخابن جاره‌ك دن ژی كوردان ل توركیا برینه‌ك كوور سه‌ند و دیت كو ده‌ما مژار ب به كورد و مافێن كوردا ب ته‌نێ نه.
