هونه‌رمه‌نده‌كێ كورد د به‌ریكانێ دایه بۆ وه‌رگرتنا بهاترین خه‌لاتێ هونه‌ری ل بریتانیا
ئه‌ڤرۆ:
هونه‌رمه‌نده‌كێ خه‌لكێ باشوورێ كوردستانێ د به‌ریكانێ دایه بۆ بده‌ستڤه‌ئینانا خه‌لاتێ ئارتس موندی یێ هونه‌ری كو ئه‌ڤ خه‌لاته ب بهاترین خه‌لاتێ هونه‌ری یه ل بریتانیا.
پێشانگه‌ها هونه‌ری ئارتس موندی ل دووماهیا حه‌فتیا بۆری لیستا كورتكری یا پشكدارێن خه‌لاتێ ناڤهاتی راگه‌هاند و (د. روشدی ئه‌نوه‌ر) كو هونه‌رمه‌نده‌كێ كورده ئێك ژ وان هونه‌رمه‌ندان بوو یێن كو د ناڤ لیستێ دا، ئه‌ڤ به‌ریكانه د ناڤبه‌را حه‌فت شێوه‌كاران دایه كو هه‌ر ئێك ژ (د.روشدی ئه‌نوه‌ر) ژ هه‌رێما كوردستانێ و (كارۆلینا كایسیدۆ) ژ وه‌لاتێ بریتانیا، (عالیه فه‌رید) ژ كوێتێ، (نایۆمی نیكۆن گه‌لاردۆ) ژ بریتانیا، (تالۆی هاڤینی) ژ بۆگواینڤیل، (نگوێن ترین تی) ژ ڤێتنام، (مونیره ئه‌لسولح) ژ لوبنانێ و هوله‌ندا، چانسێ بده‌ستڤه‌ئینانا خه‌لاتێ ده‌هێ هه‌یه كو ئه‌ڤ خه‌لاته هه‌ر دو سالان جاره‌كێ دهێته دان و مه‌زنترین خه‌لاتێ هونه‌ری یێ سه‌رده‌مانه‌یه ل بریتانیا كو یێ پێكهاتیه ژ 40 هزار پاوه‌نان، هه‌ر وه‌كو رووداو به‌لاڤكری كارێن هونه‌ری یێن شێوه‌كاران ل ئوكتوبه‌را سالا 2023 هه‌تا ئادارا سالا 2024 دێ ل چه‌ندین مۆزه‌خانه و باژێران هێنه نیشادان و دووڤ دا ئێك كه‌ڤال دێ خه‌لاتێ ئارتس موندی ب ده‌ستخوه‌ڤه ئینیت.
د. روشدی ل سالا 1971 ل پارێزگه‌ها حه‌له‌بجه ژدایكبوویه، ل سالا 1992 ئه‌ندازیاری یا شارستانی ل زانكۆیا كوركووكێ ب دووماهی ئینایه، دووڤ دا باوه‌رناما گرافیك دیزاینێ ل زانكۆیا سیدنی ل ئوسترالیا ب ده‌ستڤه‌ئینایه، ل سالا 2010 ماسته‌ر ل هونه‌رێن جوان یا زانكۆیا میلبۆرنی ل ئوسترالیا ب ده‌ستڤه‌ئینایه، دووڤ دا ژی ل سالا 2016 ل هه‌مان زانكۆ بوویه هه‌لگرێ باوه‌رناما دكنۆرایێ ب فه‌لسه‌فا هونه‌ری، ناڤهاتی 29 خه‌لاتێن هونه‌ری ل چه‌ند جهێن جودا جودا یێن جیهانێ وه‌رگرتینه و پشكداری د پتری 100 پێشانگه‌هێن هونه‌ری یێن نێڤده‌وله‌تی دا كریه.
