هونه‌رێ كوردان هه‌رده‌م خوه ل ئێش و ئازارێن ملله‌تی كریه خودان
هونه‌ر رێكه‌كه ژبۆ په‌یداكرنا شارستانیه‌ته‌كا ب هێز د ناڤ جڤاك و وه‌لاتێ خوه دا، گازیه‌كه ژبۆ ئاڤاكرنا ڤیانه‌كا راسته‌قینه، جا چ ئه‌ڤ ڤیانه د ناڤبه‌را دو كه‌سان دا بت یان ژی ڤیانا گه‌ل و وه‌لاتی بت، یا دیار و ئاشكه‌رایه هونه‌رێ كوردان هه‌ر ژ كه‌ڤندا و تا نهو خوه ل ئێش و ئازارێن ملله‌تی كریه خودان، ئه‌و زۆرداری و سته‌ما كوردان ب ده‌ستێ زۆردارو ناحه‌ز و خوین مێژێن ڤی ملله‌تی دیتین ئیناینه به‌رچاڤ، مه‌لایێ جزیری ئه‌وێ دئێته ناڤكرن ب مه‌زنترین هۆزانڤانێ كورد ل سه‌رده‌مێ خوه و خوه‌دیێ په‌یڤێن پر دوور و مراری و هۆستایێ كێش و سه‌روایا هۆزانا كوردی و ئێكه‌مین هۆزانڤانێ كورد بوویه ناڤێ پیرۆزێ كوردستان د هۆزانا خوه دا ئینایه د ده‌مه‌كیدا كو ب تاوان دهاته بناڤكرن، دیسان ئه‌حمه‌دێ خانی خوه‌دیێ هزرا نه‌ته‌وه‌یی ب نڤێسینا مه‌م و زین كو ئه‌و بیدعه‌یا وی ئینایه كار ژبه‌ر هندێ بوویه كو ئه‌و سته‌ما ژلایێ دوژمنان ل كوردان دهاته‌كرن ژ لایێ هه‌ردو رژێمێن وی ده‌می (سه‌حوه‌یا شیعی ل ئیرانێ و عوسمانی یا حوسنی ل توركیا) مه‌یدانا زانین و زانیاریێ نه‌هێلا ڤالا، دیسا ژ لایێ هونه‌رێ سترانێ هونه‌رمه‌ند و شه‌یدایێ كوردینیێ شڤان په‌روه‌رێ خوه‌دیێ (كینه ئه‌م) ئه‌وێ ب هزاره‌هان گه‌نجان ب كارتێكرنا ستران و سرودێن وی مه‌رگێ خوه كریه د لیلیێن تڤه‌نگاندا و خوه ل چیایێن كوردستانێ كرینه خوه‌دی، یان ژی هونه‌رمه‌ندێ كوردپه‌روه‌ر و شه‌هیدێ كوردینیێ ئه‌رده‌وان زاخۆیی مینا مرۆڤێن خودان وژدان بنده‌ستیا ملله‌تێ كورد ده‌رده‌ك مه‌زن بوویه د سینگێ ویدا و هه‌ستا وی وه‌كو مرۆڤه‌كی كورد و خودان دۆز ب گیانه‌ك پری به‌رپرسایه‌تی وه‌كۆ قوناغێن دیرۆكێ ل دووڤ ده‌می هه‌ست ب به‌رپرسایه‌تیا خوه یا نه‌ته‌وه‌یی كریه له‌ورا دگۆت: (كوردم دخوینم زولمێ دبینم دوژمن بزانه چیا دێ هه‌ژینم) تاكو بوویه ئه‌گه‌رێ شه‌هیدكرن و ژ ناڤبرنا وی، ئها هۆسا و ب ڤی ره‌نگی هونه‌ر و هونه‌رمه‌ندێن كوردان د هه‌می كاوداناندا بووینه بارهه‌لگرێن خوه‌شی و ناخوه‌شی یێن گه‌لێ خوه، نه‌مازه ل ڤێ داویێ و پشتی هاتن و په‌یدابووین و هیرشكرنا تیرۆریستێن ب ناڤ (داعش) بۆ سه‌ر ئاخا پیرۆزا ڤه‌قه‌تیایی یا كوردستانێ و تالانكرن و وێرانكرنا گوند و باژێركێن كوردان و وێ به‌ره‌ڤانی و به‌رسینگ گرتن و قه‌هره‌مانیا پێشمه‌رگه‌یێن كوردستانا باشوور ب لوولیێن تڤه‌نگان ده‌نگ ل جیهانێ ڤه‌دایی و سه‌رۆك و سه‌ركرده‌یێن هه‌ری بلند یێن جیهانێ ل هه‌ولێرا پایته‌خت خرڤه‌كرین، هونه‌رمه‌ندێن كوردان زانینه كو هونه‌ر باشترین رێكه ژبۆ هشیاركرنا تاكێ كورد و په‌یداكرنا هه‌ستا نه‌ته‌وه‌یی ب ره‌نگه‌كێ به‌رده‌وام د ناڤ خه‌لكی دا، له‌ورا مل ب ملێ پێشمه‌رگه‌یێن دلێر و ب ده‌نگ و هزر و تبلێن خوه یێن زێرین شاشه‌یێن تیڤی یێن كوردی پری سروود و سترانێن شۆره‌شگێری و پێشمه‌رگایه‌تی كرینه و نه‌ڤیاینه خوه ژڤێ به‌رپرسایه‌تیا دیرۆكی ڤه‌ده‌ركن، ئه‌ڤجا ب هه‌ر كێم و كاسیه‌كا هه‌ی ده‌ستخوه‌شیێ ل كارێ وان یێ پیرۆز دكین و داخوازا به‌رده‌وامیێ بۆ دخوازین و دبێژینێ وه ژی شۆره‌شه‌ك هونه‌ری به‌رپاكر و په‌یڤا پێشمه‌رگه ب به‌رده‌وامی د ناڤا جڤاكی دا هێلایه زیندی نه‌مازه د ناڤا گه‌نج و لاوان دا و من باوه‌ره گه‌ر نها پرسا گۆتنا سترانه‌كێ ژ كیش زارۆكێ كورد بكه‌ی ب نازكی و خوه‌شیا ده‌نگێ خوه دێ بێژت: پێشمه‌رگه پێشمه‌رگه بلندیا چیایێ ژۆری.
