هونەرمەند «حسێن حەسەن» ڕۆلێ سەرەکی د فلمێ (ماسیگر) دا گێڕایە
زاخۆ، دلۆڤان هالۆ:
فلمێ سینەمایی یێ کوردی بناڤێ (ماسیگر) ژ دەرهێنانا هونەرمەند لۆقمان قاسمیە، و هەر ئێك ژ هونەرمەندان حسێن حەسەن و نزار سەلامی و شەماڵی عەبەڕەش وەکو ئەکتەر ڕۆلێ سەرەکی دڤی فلمی دا گێڕاینە، و دهێتە چاڤەڕێ کرن پشتی کو ئەڤ فلمە پشکداریێ د فیستەڤالێن سینەمایی یێن جیهانی دا بکەت، پاشان ل سینەمایێن کوردستانێ بهێتە نیشاندان.
چیڕۆکا فلمی ژ لایێ پەیمان نعمەتی و مەهدی ئەنساری ڤە هاتیە نڤیسین، و ئەڤ فلمە ژ لایێ لۆقمان قاسمی و د. میاجان مالکزادە و عەلی ئحسان ڤە هاتیە بەرهەمئینان، هژمارەکا هونەرمەند و بسپۆران د بیاڤێ فلمسازیێ دا وەکو مۆزیك و دەنگ و مەیکئاپ و دیزاینا پۆستەری پشکداری د ڤی فلمی دا کرینە.
ئەڤ فلمە چیرۆکا هندەك کەسان ڤەدگێڕیت کو ناچار دبن وەلاتێ خوە بجهـ بهێلن و بۆ ژیانەکا نوو یا ژ دەرڤەی وەلاتی ڤە بچن، لێ پشتی کو د گەهنە وەلاتەکێ دی نە بتنێ وان ئاریشەیا زمانی و نەبوونا دەلیڤەیا کاری هەنە، بەلکو وان ئاریشەیا جیاوازیا یاسایێ و کەلتووری و دابونەریتێن جڤاکی ژی هەنە، ئەڤ کەسە بزاڤا وێ چەندێ دکەن کو هەر ل سەر هزر و بیر و دابونەریتێن خوە یێن جڤاکی بژین، لێ ل وی وەلاتی هندەك ژ دابونەریتێن وان ناهێنه قەبوولکرن چونکی بەرۆڤاژی یاسا و مافێ مرۆڤی نە.
ئەف فلمە ب شێوەیەکێ ڕەخنەیی نیشان ددەت کا چاوا هندەك کەس نەشێن خوە لگەل کەلتوور و دابونەریتێن وەلاتەکێ دی بگۆنجینن، و بزاڤا وێ چەندێ دکەن کو دابونەریتێن خوە یێن کەڤن ب سەر ژیانا خوە یا نوو دا ب سەپینن، بۆ نموونە ئەو هزرکرنا د هندەك جڤاکان دا دەربارەی توندوتیژیا دژی ژنان یان کۆشتنا وان بناڤێ شەڕەفێ هەی، ئەڤ فلمە نیشان ددەت کو ل بەهرا پتر یا وەلاتێن ئەورۆپی نە بتنێ ئەڤ چەندە ناهێتە قەبوول کرن بەلکو تاوانەکا مەزنا یاسایی و مرۆڤایەتیە.
ب ڕێکا چیڕۆکا ئەکتەران ئەڤ فلمە پسیارەکا گرنگ ئاراستەیی بینەران دکەت کا دەمێ مرۆڤ پەنابەر دبیتە وەلاتەکێ دی، بتنێ دشێت جهێ ژیانا خوە بگۆهوڕیت یان ژی پێدڤیە شێوەیێ هزرکرن و ڕەفتارێن خوە لگەل یاسا و بهایێن وێ جڤاکا تێدا دژیت بگۆهۆڕیت، ئەڤ فلمە بزاڤان دکەت کو ئەو هەڤڕکیا دناڤبەرا دەمێ بووری و نوکە دا یاسا و دابونەریت و ناسنامە و تێکەلیا جڤاکا نوو ب شێوەیەکێ دڕاماتیکی یا کاریگەر بەرچاڤ بکەت.
