هێشتا ب تنێ ناڤێ پێنج هزار حه‌جيان ڤه‌گه‌ريايه
ئه‌ڤرۆ نيوز، نيوار محه‌مه‌د سه‌ليم:
ناڤێ كاروانێ ئێكێ يێ حه‌جيێن هه‌رێما كوردستانێ بۆ بجهئينانا فه‌ريزا حه‌جێ ڤه‌گه‌ريايه و ئاماده‌كاريێن ته‌مام ژى هاتينه كرن بۆ ڤه‌گوهاستنا وان ل رۆژا دياركرى.
هه‌ر چه‌نده بڕيار بوو ئه‌ڤ ساله ناڤێ حه‌فت هزار كه‌سان ب ڤه‌گه‌ريێت، به‌لێ وه‌زاره‌تا ئه‌وقافێ راگه‌هاند كو ب فه‌رمى ئه‌و بڕياره نه‌گه‌هشتيه ده‌ستێ وان و هێشتا ناڤێ پێنج هزار كه‌سان ب تنێ ڤه‌گه‌ريايه.
كێمتر ژ هه‌يڤه‌كێ مايه دا كو كاروانێ ئێكێ يێ حاجيێن هه‌رێما كوردستانێ بۆ بجهئينانا فه‌ريزا حه‌جێ بۆ سعودى بهێنه ڤه‌گوهاستن، رێڤه‌به‌ريا ئه‌وقافا هه‌رێمێ ژى رادگه‌هينيت كو هه‌موو ئاماده‌كارى هاتينه كرن و كاروانێ ئێكێ ژى بڕياره ل 10ى تيرمه‌هێ ب رێ بكه‌ڤيت.
زێده‌تر ژ 100 كۆمپانيێن ڤه‌گوهاستن و گه‌هاندنێ هاتينه ته‌رخانكرن بۆ ڤه‌گوهاستنا حه‌جيان ژ هه‌موو پارێزگه‌هێن هه‌رێما كوردستانێ و هه‌ر كۆمپانيه‌ك ژى ب تنێ دشێت ئه‌رگێ ڤه‌گوهاستن و پاراستنا 47 حه‌جيان ب ستوويێ خوه ڤه بگريت و هه‌موو هه‌ماهه‌نگى ژى هاتينه كرن.
د ماوێ سێ سالێن بۆرى دا، ل هه‌رێما كوردستانێ ناڤێن 86 هزار و 860 كه‌سان بۆ حه‌جێ هاتيه تۆماركرن و سالانه ب ره‌نگێ پشككێشانێ ناڤێ پێنج هزار كه‌سان د ڤه‌گه‌ريت و هه‌ر كه‌سه‌كى/كه‌سه‌كێ بۆ ڤێ مه‌ره‌مێ ژى پێدڤى ب چار هزار و 200 دۆلارێن ئه‌مريكى يه و زێده‌ترى 35 رۆژان ل وه‌لاتێ سعوديێ د مينن.
