هەتا پارەیێ سالا بۆری تەمام نەبیت پارەیێ گەنمـێ ئەڤ سالە ناهێتە هنارتن
هەولێر، قائید میرۆ:
بەرپرسەكێ وەزارەتا بازرگانی و پیشەسازی ئاشكراكر، هەتا پارەیێ سالا بۆری تەمام نەبیت، پارەیێ وەرگرتنا گەنمێ ئەڤ سالە ناهیتە هنارتن و دبێژیت: هێشتا نیڤا پارەیێ كڕینا گەنمێ سالا بۆری نەهاتیە مەزاختن و بڕیارە مەهانە گوژمەك بهێتە هنارتن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، سالا بۆری 450 هزار تەنێن گەنمی ژ لایێ بازرگانیا ئیراقێ ڤە ژ جۆتیارێن هەرێما كوردستانێ هاتبوو وەرگرتن، ب بهایێ 301 ملیار دیناران و گۆت: «هەتا نوكە ژ ئەڤی گوژمێ پارەی، ب تنێ 141 ملیار هاتینە هنارتن، نیڤا پارەیێ گەنمێ جۆتیاران مایە هێشتا نەهاتیە مەزاختن، بەلێ گورەی بڕیارەكا سەرۆكایەتیا جڤاتا وەزیرێن ئیراقێ دێ مەهانە گوژمەكێ پارەی بۆ جۆتیاران هێتە مەزاختن».
ل دۆر هنارتنا پارەیێ ئەڤ سالە نەوزاد شێخ كامل گۆت: «راستە پرۆسێسا رادەستكرنا گەنمی ئەڤ سالە ب دوماهی هاتیە و پێدڤیە پارەیێ وەرگرتنا گەنمی بهێتە هنارتن، بەلێ هەتا پارەیێ سالا بۆری هەموو نەهێتە هنارتن، پارەیێ ئەڤ سالە ناهێتە مەزاختن و هنارتن».
