هەرێما مە چو جاران نابیتە پەناگەهەك بۆ دز و گەندەلان
ئاشتی سالح
ل ڤێ قۆناغا هەستیار و ل ڤی سەردەمێ پر ژ مەترسی و گوهۆرینێن ب لەز، پاراستنا قەوارێ هەرێما كوردستانێ ئەركەكێ پیرۆز و نیشتمانی یێ هەموو تاكەكێ ڤێ خاكێ یە. هەرێما مە، ئەو دەستكەفتێ ب خوینا شەهیدان و ماندیبوونا گەلەكێ خەباتگێر هاتیە مسۆگەركرن، ئەڤرۆ رووبەروویێ شەپۆلەكا نەخشە و پلانێن نەحەز و دوژمنان بوویە، یێن كو ب هەر رێیەكێ دڤێن ڤی قەوارەی ژناڤ ببەن و سەقامگیرییا مە تێكبدەن.
ئاشكرایە كو دوژمن و نەحەزێن كوردستانێ زۆرن و ئەڤرۆ ب شێوەیەكێ ئاشكرا ل دووڤ نەخشە و پلانێن هندەك وەلاتێن جیران كاردكەن. وان دڤێت ب رێكا فیتنە و دوبەرەكیێ، جڤاكی و سیاسی یێ هەرێما مە لێك بئێخن و رێزێن ناڤخۆیی یێن كوردستانێ لاواز بكەن. ئەڤ نەخشە و پلانێن خراب، نە تنێ هەڕەشەن ل سەر داهاتیێ مە، بەلكۆ هەڕەشەن ل سەر هەبوونا مە یا نەتەوەیی ژی. لەورا ل ڤێ دەمێ دا، بێدەنگبوون ل هەنبەر ڤان پیلانان، واتە ڤەكێشانا دەستێ خۆ ژ ئاڤاكرنا پاشەرۆژەكا گەش.
باشترین ب تنێ رێیا شكاندنا وان پیلانان، و تێكدانا وان نەخشەیێن دوژمن بۆ مە دانین، ب ئێكگرتن و ئێكڕیزیێ دبیت. دیتنا مە یا جودا د سیاسەتێ دا، دڤێت نەبیتە ئەگەرێ ڤەقەتاندنا مە ژ ئێك، بەلكۆ دڤێت وێ دیتنێ بكەینە دەرفەتەك بۆ هندێ كو ب هەموو ئالیان ڤە، ل سەر ئاستێ نیشتمانی دگەل ئێك كۆم ببین. هەمی لایەنێن سیاسی، رەوشەنبیر، پێشمەرگە و وەلاتیێن مە، دڤێت بزانن كو پاراستنا هەرێمێ، بەرپرسیارییا هەموو كەسەكی یە. ئێكگرتنا مە، قەڵغانەكا ئاسنی یە، ئەو قەلغانە یا كو نەخشەیێن هەر دوژمنەكێ دێ كەتە هەوار و دێ كوردستانا مە د پاراستی و سەربلند هێلیت.
نەحەزێن مە، دڤێن ب رێكا لاوازكرنا باوەریا ناڤخۆیی، هەڕەشێ ل سەر قەوارەیێ مە دروست بكەن، لەورا پێدڤیە ئەم ل هەمبەر ڤان هەولان هوشیار بین. بلا هەر لایەنەك بزانیت كو دوژمن جوداهیێ د ناڤبەرا مە دا ناكەت و ئارمانجا وان ئەوە كو ڤی دەنگێ ئازاد و ڤی قەوارەیێ فیدرالی ژناڤ ببەن. ب هەلوەستەكێ نەتەوەیی یێ ئێكگرتی، ئەم دشێین هەر پلانەكا خراب ژناڤ ببەین و پەیاما خۆ یا ئاشتیخوازانە و ئازادیخوازانە بگەهینینە هەموو جیهانێ.
كوردستان، ب تنێ ب ئێكگرتنا كوڕ و كچێن خۆ دێ یا پاراستی بیت. قانوون، دادپەروەری و دلسۆزی بۆ خاكێ، ئەو بنەمایێن مە یێن سەرەكینە د ڤی شەڕی دا. بلا ئەم هەموو ب ئێك دەنگ و ب ئێك دل، ل هەنبەر هەر هەڕەشەیەكێ ب راوەستین و نیشا هەموو جیهانێ بدەین كو قەوارەیێ هەرێما كوردستانێ، ب ئێكگرتنا مللەتێ مە یێ رەسەن، دێ یا هێز و سەقامگیر بیت و هەر پیلانەكا خراب دێ ل بەرانبەری ئیرادەیا مە شكێت. هەرێم یا مە هەمیانە و پاراستنا وێ، پاراستنا شكۆیا مە هەمیانە.
