هەرێم و بەغدایێ لیژنەیەك بۆ چارەسەركرنا ئاریشەیا زانكۆیان پێكئینایـە
هەولێر، قائید میرۆ:
بەرپرسەكێ وەزارەتا خواندنا بلند ئاشكرا كر، لیژنەیەك بۆ دانپێدانا زانكۆیان د ناڤبەرا هەرێما كوردستانێ و بەغدایێ دا هاتیە پێكئینان و دانوستاندن هەنە، دانپێدانانێ ب چەندین زانكۆیان بكەن.
دكتۆر ئیبراهیم حاجی رەشید، رێڤەبەرێ خواندنا ئەهلی ل وەزارەتا خواندنا بلند و ڤەكۆلینێن زانستی بۆ رۆژناما ئەڤرۆ دیار كر، لیژنەیەك د ناڤبەرا هەردو وەزارەتێن خواندنێن بلند یێن حوكمەتا هەرێما كوردستانێ و بەغدایێ دا هاتیە پێكئینان، ب مەرەما چارەسەركرنا ئاریشەیا دانپێدانا زانكۆیان د ناڤبەرا هەرێما كوردستانێ و ئیراقێ دا و گۆت: «دانوستاندن ژی د بەردەوامن، ب مەرەما گەهشتن ب ئەنجامان، هەكە بگەهینە رێككەفتنێ، ئاریشەیا دانپێدانانا زانكۆیان د ناڤبەرا هەرێم و بەغدایێ دا دێ هێتە چارەسەركرن».
دكتۆر ئیبراهیم حاجی رەشید گۆتژی: «ل هەرێما كوردستانێ 18 زانكۆیێن ئەهلی هەنە و پشكەك ژ وان زانكۆیان ئاریشەیا دانپێدانانێ هەیە، ئەڤ سالە ژی چو زانكۆیەكا نوو مۆهلەت نینە بهێتە ڤەكرن، هەژمارەكا زانكۆیان هەنە، وەزارەتا خواندنا بلندا بەغدا دانپێدانانێ پێ ناكەت و یێن هەرێما كوردستانێ نە، ب هەمان شێوە هەژمارەكا زانكۆیان ل دەڤەرێن كوردستانی هەنە و مە دانپێدان پێ نەكریە و هەژمارەكا زۆرا قوتابیێن هەرێما كوردستان ل ئەڤان زانكۆیان دەرچووینە».
