هەر ئاوارەیەكێ ڤەگەڕیت دێ چوار ملیون دیناران و كەل و پەلێن ناڤمالێ ب دیاری وەرگریت
لەزگین جوقی
وەزارەتا كۆچ و كۆچبەرێن ئیراقێ دیار كر، هەر ئاوارەیەكێ ڤەگەڕیت دێ هاریكاریێ وەرگریت، ئەو ژی پێدانا پارەی، دابینكرنا كەل و پەلێن ناڤمالێ و تۆڕا چاڤدێریا جڤاكی و دامەزراندنێ و چەند هەلبژارتن داناینە بۆ زڤرینا ئاواران».
عەلی عەباس، پەیڤدارێ وەزارەتا كۆچ و كۆچبەرێن ئیراقێ بۆ رۆژنامەیا ئەڤرۆ ڕاگەهاند، پێدڤیە هەتا 30/6/2024ی هەموو كەمپێن ئاواران بهێنە داخستن، بۆ ڤێ مەرەمێ چەند هەلبژارتن دێ ب ئاواران هێنەدان، ئەو ژی ڤەگەڕیان بۆ جهێن خۆ یان ئاكنجیبوون ل وان جهێن ئەو نوكە وەكو ئاوارە لێ د ئاكنجی، یان ژی چوونا پارێزگەهەكا دی و ب ڤێ ڕەوشێ ئەو دێ وەكی ڤەگەڕیایی ئاوارە هێنە هەژمارتن».
پەیڤدارێ وەزارەتا كۆچ و كۆچبەرێن ئیراقێ ئاشكرا كر، هەر ئاوارەیەكێ ڤەگەڕیت دێ هاریكاریێ وەرگریت، ئەو ژی پێدانا پارەی، دابینكرنا كەل و پەلێن ناڤمالێ و تۆڕا چاڤدێرییا جڤاكی و دامەزراندنێ».
د ئالیەكێ دێ دا مەحما خەلیل، ئەندامێ جڤاتا نوونەرێن ئیراقێ بۆ ئەڤرۆ ڕاگەهاند، حوكمەتا ئیراقێ بڕیار دایە هەتا 30/6/2024ێ هەموو ئاوارە ڤەگەڕنە جهێن خۆ، (UN) ژی پشتڕاست دكەت كو ڕەوشا شنگالێ د بەرژەوەندییا ئاواران دایە و ڕەوش یا ئارامە و دڤێت ڤەگەڕنە جهێن خۆ.
مەحما خەلیل دیاركر، حكومەتا ئیراقێ ڕاگەهاندییە كو هەر خێزانەكا ئاوارە ڤەگەڕیتە جهێن خۆ دێ چار ملیۆن دیناران وەرگریت و ئەڤ بڕیارە دێ ئاوارەیێن هەرێمێ ژی ڤەگریت.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ دیاركر، ئاوارە بۆ زڤرینا سەر جهێن خۆ دئازادن، هیچ ئاوارەك ب زۆری ناهێتـە زڤراندن، ئەم دێ بەردەوام هاریكاریێ و پشتەڤانیا ئاوارە كەین هەتا دناڤ كەمپان دا مابن هەتا نوكە پتر ژ 300 هزار ئاوارە دناڤ 20 كەمپان دا ل سنۆرێ پارێزگەها دهۆكێ دژین.
خۆیا كر، حكومەتا هەرێما كوردستانێ نوكە وارێ دابینكرنا ئاڤێ و كارەبێ و پەروەردی و ساخلەمیێ و شارەوانی هەڤكاریا ئاواران دكەت و دێ هاریكاری و پشتەڤانیا حكومەتا هەرێما كوردستانێ بۆ ئاواران یا بەردەوام بیت».
مەحما خەلیل، ئەندامێ جڤاتا نۆینەرێن ئیراقی راگەهاند، وەزارەتا كۆچ و كۆچبەرێن ئیراقێ شكەستن د خزمەتكرنا ئاواران دا ئینایە و چ پلان بۆ ڤەگەراندنا ئاواران نینن، كەلوپەلێن ب سەرڤەچوویی ل سەر خەلكێ ئاوارە دناڤ كەمپان دا دابەش كرینە، مە داخواز كرییە كو وەزارەتا كۆچ و كۆچبەران ل ئیراقێ بهێتە هەلوەشاندن و ئەو وەزیرە بۆ پەرلەمانی بهێتە گازیكرن».
