هەر كەسەكێ گەندەلیەكـێ ئاشكرا بكەت دێ هێتە خەلاتكرن
هەولێر، قائید میرۆ:
سەرۆكێ دەستەیا گشتیا دەستپاكیێ خویاكر، هەر وەلاتیەك و فەرمانبەرەكێ زانیاریان ل دۆر بادەكێن گەندەلیێ بدەتە دەستەیا دەستپاكیێ، ب گوژمەكێ پارەی دێ هێتە خەلاتكرن و دبێژیت: ناڤێ چو كەسەكی ژی ناهێتە ئاشكراكرن.
حاكم ئەحمەد ئەنوەر، سەرۆكێ دەستەیا دەستپاكیێ د نڤیسارەكێ دا كو وێنەیەك گەهشتیە رۆژاناما ئەڤرۆ دیاركریە، ب مەرەما نەهێلانا گەندەلیێ و وەرگرتنا بەرتیلان و خراب بكارئینانا دەستهەلاتێ، ل گورەی قانوونا دەستەیا دەستپاكیێ هەر وەلاتیەك یان فەرمانبەرەك زانیاریان بدەتە دەستەیا دەستپاكیێ ل دۆر هەبوونا گەندەلیێ، پێدڤیە دەستە بهێتە ئاگەهداركرن، ئەگەر زانیاری د دروست بن، ئەو فەرمانبەرە یان وەلاتیە دێ هێتە خەلاتكرن.
حاكم ئەحمەد ئەنوەر گۆت: «كەسێن زانیاریان ل دۆر بادەكێن گەندەلیێ پێشكێشی دەستەیا دەستپاكیێ دكەن، ب گوژمەكێ پارەی دێ هێنە خەلاتكرن و ب چو شێوەیەكی ناڤێ وان ژی ناهێتە ئاشكراكرن و گەرەنتیا پاراستنا وان دێ هێتە كرن، ئەڤە ژی پێخەمەت پاراستنا سامانێ گشتی و ڤەگەڕاندن بۆ گەنجینەیا حوكمەتێ».
