هەكە بڕیارا دادگەها فیدرالی بهێتە جێبەجێ كرن دشێن (هژمارا من) بكاربینن
دووڤچوون:
دادگەها فیدرالی ب فەرمی، ناڤەرۆكا بریارا خۆ دەربارێ مووچەیێن مووچەخۆرێن هەرێما كوردستانێ بەڵاڤكر كۆ وەك هەمی بریارێن دی یێن دادگەهێ، د روانگەها دژایەتیكرنا هەرێما كوردستانێ و كێمكرنا دەسهەلاتێن دەستووریێن هەرێما كوردستانێ دەرخستیە.
ب گوتنا پەرلەمانتارێن لژنا دارایا پەرلەمانێ ئیراقێ، تەیف سامی، وەزیرا دارایا ئیراقێ گۆتیە هەتا هەمی مووچەخۆرێن هەرێما كوردستانێ ل بانكێن فیدرالیێن ئیراقێ هژمارا بانكی چێنەكەن، مووچەیێ هەیڤا سێ ناهنێرین، بەلێ ئەگەر وەزیرا داراییا ئیراقێ بریارا دادگەها فیدرالی ب تمامی جێبەجێ بكەت، ئەڤە پێدڤی ب ڤەكرنا هژمارا بانكی ل بانكێن فیدرالی نینە.
د برگا (ئێكێ) یا بریارا دادگەها فیدرالییا ئیراقێ دا چ ئاماژەكا راستەوخۆ ب وێ نەدایە كۆ دڤێت هەمی مووچەخۆر هژمارا بانكی ل بانكێن فیدرالی ڤەكەن، بەلكو تنێ ئەو كریە مەرج كۆ هەمی سازیێن هەرێما كوردستانێ هەماهەنگییا راستەوخۆ دگەل وەزارەتا داراییا ئیراقێ بكەن بۆ هندێ كۆ مووچەیێن مووچەخۆران ل بانكێن فیدرالی بهێتە جێگیر (توگین) كرن.
هەڤدەم ب دەق د بریارێدا هاتیە: ”ل سەر هەمی بانكێن سەر ب داخازكریێ ئێكەم (حكوومەتا فیدرالی) هێسانكاری بۆ كرداریێ جێگیركرن (توگین) بكەن و هەمی رێكێن پێتڤیە بگرنە بەر بۆ هندێ كۆ مفاداربن (فەرمانبەر یان راسپاردی ب ئەركێ گشتی یان خانەنشینی یان مفادارێن تۆرا پاراستنا جڤاكی) بشێن ل جهێ ئاكنجیبوونا خوە مووچەیێن خوە وەربگرن، ئەو ژی برێكا وان دەروازێن ل هەرێمێ بڵاڤبوونە یان برێكا وان بانكێن ل هەرێما كوردستانێ و دەستێری ژ بانكێن ناڤەندیێن ئیراقێ وەرگرتیە.“
ل گۆرەی شەهرەزایێن یاسایی، ل دووڤ وێ برگا بریارا دادگەها فیدرالی، وەزارەتا داراییا ئیراقێ و بانكێن فیدرالی دشێن بلەز بریارێ جێبەجێ بكەن و مووچەیێن مووچەخۆرێن كوردستانێ نەهێتە پاشخستن، پەنایێ بۆ پرۆژێ (هژمارا من) ببەن كۆ دەمەكە حوكمەتا هەرێما كوردستانێ كار ل سەر دكەت و د ڤێ رێیێدا سەدان هزار مووچەخۆران هەتا نوكە هژمارا بانكی ژ بانكێن كوردستانێ ڤەكریە.
