هەكە ژنێ بڤێت دوگیان ببیت، دڤێت چاڤدێریا خوارنا خوە بكەت
ئەڤرۆ
بەرپەرێ ساخلەمیێ:
د. زوزان عبدالرحمن فارس، تایبەتمەندا نەخۆشیێن ژنان و زارۆكبوونێ و نەزۆكیێ و زارۆكێن بلوری دیاركر هەر خوارنەكا ژلایێ ژنێ بهێتە خوارن چ یا دوگیان یان نەزۆكی هەبیت و ئنیەتا دوگیانیێ هەبیت، كارتێكرنا وێ خوارنێ بۆ دەمێ دوازدە حەفتیا و پتر دمینیت، ئانكو ئەم دشێین بێژین دەمێ رۆژیگرتنێ كو 14 سعەتا خوارن ناهێتە خوارن، ئەڤ چەندە پێدڤیە ژلایێ ژنا نەزۆكی هەی بەرچاڤ بهێتە وەرگرتن و پرۆگرامەكێ باش بو خوە بدانیت و بزانیت دێ چ جورێ خوارنێ خۆت و نابیت هزربكەت كو 14 سعەتە چ نەخواری یە، ئێدی هەر تشتێ بڤێت دشێت بخۆت، ب تایبەت ژنێن نەزۆكی هەی، ئاریشێن هەین، یان د قەلەو یان زەعیفن، ئەڤەژی دبیتە ئەگەر هورمۆنێن وان تێك بچن یان ئاستێ وان دێ كێم بیت، لەورا هەكە ژنێ بڤێت دوگیان ببیت، دڤێت چاڤدێریا خوارنا خوە بكەت، چونكو كارتێكرنا وێ بۆ سێ هەیڤان پشتی هێنگی دمینیت.
دەربارەی ژنا دوگیانژی، دیاركر، هەر گوهۆرینەك د خوارنێ دا، ژبلی كو رەنگە كارتێكرنێ ل وێ بكەت، كارتێكرن ل زارۆكی ژی دبیت، چونكو د دەمێ دوگیانیێ دا، پێدڤیە 300 كالوری ژ خوارنا وێ پتربن ژ دەمێن دی، لەورا د وی حالەتی دا، رەنگە ئەو نەشێت وێ رێژێ زێدەبكەت، لەورا ڤیتامین و كانزا بۆ زارۆكی وەكو پێدڤی ناچن، لەورا فەرە یا ئاگەهداربیت ژ وەرگرتنا ( ڤیتامین، كانزا و ئاسنی) و ڤەخوارنەكا باش یا شلەمەنیان هەبیت، و گۆتژی: دەمێ دوگیانیێ ئەو دەمە یێ ئەندامێن زارۆكی جێدبن، دگەل هەڤالبچووكی و هەلبەت هەر ئاریشەك د هەڤالبچووكی
دا هەبیت، دێ بیتە ئەگەر خوین ب دروستی نەگەهیتە زارۆكی، لەورا دڤێت دایك بابەتێ خوارنێ ب سڤكی وەرنەگریت.
د.زوزانێ دیاركر كو ل دووڤ ڤەكۆلینێن دووماهیێ دیاردبیت كو هەكە خوارن و ڤەخوارن ب تایبەت د سێ هەیڤێن ئێكێ یێن دوگیانیێ نەگەهنە زارۆكی، نەدوورە ل پاشەرۆژێ پتر تووشی قەلەویێ و ئێشێن دلی و بلندبوونا فشارا خوینێ و كولیسترولی ببن. لەورا پێدڤیە دایك پاشەرۆژا زارۆكی ل بەرچاڤ وەربگریت.
هەروەسا دیاركو كو ل هەر سێ هەیڤێن نیڤا دوگیانیێ چ ئاریشە نینن هەكە ژن یا ب رۆژی بیت، بەلێ سێ هەیڤێن دەستپێكێ د گرنگن بو ساخلەمیا زارۆكی، لەورا هەبوونا هەر ئالوزیەكێ دخوارنێ دا، دێ دگەل زارۆكی مینن هەتا دووماهیێ، لەورا گرنگە پێدڤیێن خوە وەربگریت و گۆت: ئەو ژنێن دەستپێكێ دلرابوون هەی، دروستە نەگریت ژی، چونكو كێمخوارنێ دخۆت و دەمێ 10 سعەتا رەنگە نەشێت وان هەموو پێدڤیان وەربگریت، هەروەسا دەمێ گەلەك دلرابوون هەبیت، خوین تیردبیت، تیڕبوونا خوینێ ژی دبیتە ئەگەر رەنگە زارۆك د زكیدا بمریت، یان بۆ وێ ئاریشە پەیداببن.
د قۆناغا دووماهیێ دا ژی یا گرنگە ژن گەلەك ئاڤێ و شلەمەنیا وەربگریت، چونكو هشكبوون دبیتە ئەگەر ژان بۆ ژنێ پەیداببن و رووبەرێ مەعیدا دایكێ ب خوەژی بجووك دبیت و دێ بۆ وێ ب زەحمەتتر كەڤیت كو بشێت دانەكێ درێژ یێ خوارنێ بخۆت.
