هەلسەنگاندنا ڕۆلێ ژنێ
سۆزك زاخۆیی
گەلەك مخابن دناڤ جڤاكێ مەدا هەلسەنگاندنەك دروست بۆ ڕۆلێ ژنێ نە هاتییە كرن، هەردم د ئاستەك كێم و نزم هاتییە دیتن، ئانكو بێ تاقەت و شیانە نەشێت كارێن زەلامی بكەت. بەلێ دەمێ بەحسێ كارێن وێ دهێتە كرن ل سەر دەمێ كەڤن د ژیانا گوندیاتییێ دا ژی، دێ بینین گەلەك كارێن مەزن كرینە، بەشدار بوویە دگەل زەلامی د دروینا دەخل و دانیدا، وەكو گەنم و جەهی و نیسك و نوك و ماشێ، هەروەسا بڕینا چلی و چوونا گیایێ بهارێ و چوونا بێرێ و كێشانا ئاڤێ ب ملی ژ كانییێ و نان پەحتن و بالاڤا جلكان ب دەستی و پاقژكرنا گوڤێن پەزی و ناڤمالێ، زێدەباری بەرهەڤكرنا خوارنێ و خزمەتكرنا مێهڤانان و پەروەردەكرنا زاڕۆكان و گەلەك كارێن دی یێن ڕۆژانە، ئەڤە هەموو كارێن ژنێ بین، ما ئەڤ كارە كێم بوون ژنێ دكرن؟
ئەگەر نوكە ژی بەرێ خوە بدەینە ژنێ و كارێ وێ، هەرچەندە كار ئاسان بوویە، ب تایبەتی ل باژێڕان، بەلێ دیسان ژنێ ڕۆلەك مەزن هەیە د ناڤ جڤاكی دا، دبینین گەلەك ژن وەكو فەرمانبەر كار دكەن، چ وەكو ماموستا یان نوژدار یان هەر وەزیفەكێ دی، ئەڤجا دانەكێ ڕۆژی ژ دەرڤەی مال كار دكەن، دبنە هاریكار بۆ خێزانێن خوە و داهاتەكێ ژی ب دەستڤە دئینن، دەمێ دزڤڕنە مال ژی دیسان ب كارۆبارێن مالێ ڕادبن، وەكو پاقژكرن و حازرییا خوارنێ و سەردەرییا زاڕۆكان و چوونا بازاڕی بۆ كڕینا پێدڤییان و گەلەك كارێن دی.
ڕۆلێ ژنێ دیار و بەرچاڤە، گەلەك جاران جهێ زەلامی ژی گرتییە و گەلەك كارێن مەزن و ب زەحمەت كرینە بۆ هندێ خێزانا خوە بڕێڤە ببەت، ئەڤجا ڕۆلێ وێ نەكێمتر ژ یێ زەلامی، هەردەم خودان شیانە و دشێت كارێن مەزن ئەنجام بدەت، ژبەر هندێ دڤێت ب چاڤەكی كێم بەرێ خوە نە دەنە ژنێ، بلا هەلسەنگاندنا ڕۆلێ وێ ل دووف كارێن وێ بهێتە كرن.
