هەلوەستێ بریتانیا بوویە جهێ دلگرانیا ئیرانێ
بەری دو رۆژان وەزارەتا دەرڤە یا بریتانیا راگەهاند، کو سوپایێ پاسداران مەزنترین مەترسیە ل سەر بەرژەوەندیێن وان و دڤێت سنۆرەک بۆ چالاکیێن سوپایێ پاسداران بهێتە دانان، چونکی بهێزبوونا سوپایێ پاسداران دشێت مەترسیێن گەلەک مەزن بۆ وەلاتێن رۆژئاڤایی دروست بکەت.
ل هەمبەر داخۆیانیا وەزارەتا دەرڤە یا بریتانیا، دوهی پەیڤدارێ وەزارەتا دەرڤە یا ئیرانێ ژی راگەهاند، هەلوەستێ بریتانیا سەبارەت ب سوپایێ پاسداران ب چو رەنگەکێ ناهێتە قەبوولکرن، هەلوەستێ وەسا دێ بنە ئەگەرێ ئالۆزیێن نوو د ناڤبەرا ئیرانێ و بریتانیا دا، ئەو یەک ژی د بەرژەوەندیا چو ئالیەکێ دا نینە و دڤێت بریتانیا خوە کارەکێ وەسا دوور بکەت.
ناسر کەنعانی ئەو یەک ژی دیار کر، ئیران کار بۆ ئارامیێ ل دەڤەرێ دکەت، مخابن هندەک هێزێن بیانی ل ئیراقێ و وەلاتێن دی یێن رۆژهەلاتا ناڤین بووینە ئەگەرێ هندێ رەوشا رۆژهەلاتا ناڤین بەردەوام یا ئالۆز بیت.
