هەلگرا ریكۆردا جیهانی ژبەر كارئینانا ماددەیێن قەدەغەكری هاتە راوەستاندن
ستێرا جیهانی و بەزۆكا نیجیریا تۆبی ئەمۆسان هەلگرا ریكۆردا جیهانێ بۆ بەریكانا 100م ئاستەنگ ژلایێ لژنەیا دەستپاكیێ یا ئۆلمپیا نێڤدەولەتی هاتە راوەستاندن، پشتی گۆمان چێبووی ب كارئینانا مادەیێن قەدەغەكری یێن هێزكرنا لەشی ستیرۆیدین و دێ بۆ قارەمانیا جیهانێ یا مەها بهێت هێتە دوورئێخستن.
ل دووڤ راپۆرتا نۆژدارییا لژنا دەستپاكیێ كو ئەمۆسان خوە ژ سێ پشكنینێن دیاركرنا مادەیێن قەدەغەكری ڤەكێشایە سەرباری ئاگەهداریكرنا وێ د دەم و جهێ دەستنیشانكری دا لەوما دڤێت بەندێن سزایێ ل سەر بهێنە سەپاندن ژ وانا دووركرنا وێ بۆ ماوەیێ سالەك تا دو سالان و وەرگرتنا سۆزناما ب دەست نڤێسینێ دۆبارەنە بیتەڤە.
ژلایێ خوەڤە بەزۆكا نێجیری یا 26ی سالی دانپێدان كرییە كو ل سێ پشكنینێن لژنەیا دەستپاكیێ بەرهەڤ نەبوویە و ئەگەر ژی هەنە لێ ب چو شێوەیان خارن و ڤەخارنێن هێزێ یێن قەدەغەكری ب كار نەئیناینە و گەشبینە ئاریشەیا وێ ل دادگەها وەرزشی د بەرژەوەندیا وێ دا بهێتە چارەسەركرن و گۆت: ناهێلم كەس بێ رێزیێ ل دەستكەفتنێن من بكەت و هەتا نوكە هەلگرا ریكۆردا جیهانی مە یا 100م ب 12 چڕك و 12 پشك ژ چركەكێ ئەوا ل وەرزێ بۆری ل ئەمریكا هاتیە كرن و دێ هەیڤا بهێت ئەڤێ ریكۆردێ ژی شكێنم.
