وێنه‌گر پێدڤی ب هونه‌رێ وێنه‌گرتنێ یه، نه باوه‌رنامێ
بارزان، ره‌مه‌زان زه‌كه‌ریا:
وێنه‌گر (مه‌عروف سه‌لیم) د دیداره‌كێ دا بۆ رۆژناما ئه‌ڤرۆ گۆت: بۆ ده‌مێ پازده سالانه كارێ وێنه‌گریێ دكه‌م و پتریا وێنێن من گرتین و ئه‌رشیف كرین وێنێن سروشتی نه و پتریا ده‌مێ خوه د ناڤ سروشتێ كوردستانێ ب گشتی و یێ ده‌ڤه‌را بارزان ب تایبه‌تی دبۆرینم، ئه‌و ژی ژبوو وێنه‌گرتنێ یه كو من حه‌زه‌كا مه‌زن ل سه‌ر هه‌یه.
زێده‌تر گۆت: هه‌موو كه‌س دشێن ببنه وێنه‌گر، به‌لێ وێنه‌گری چه‌ند تایبه‌تمه‌ندی هه‌نه كو وێنه پتر جوانتر و سه‌رنج راكێشتر دیارببن، باوه‌رنامه نیشانا وێ چه‌ندێ یه كو فۆتۆ ب ره‌نگه‌كێ ئه‌كادیمی و زانستی دهێنه گرتن، و وێنه‌یێن من پتر سروشتی و گول و چیایێن كوردستانێ نه، ل گه‌ل وێنێن په‌ز كوڤیا و ئاژه‌لێن كویڤی و بالنده‌یان و دیمه‌نێن جوانێن كوردستانێ، بارزان ژبه‌ر پرسا گرنگا ژینگه‌پارێزیێ سروشتێ بێ ده‌ستكاری گه‌له‌ك یێ باشه بۆ وێنه‌گرتنێ ، و وێنه‌یێن من دوو پشكن، پشكه‌ك دكیۆمێنتاری كو ئه‌رشیڤكرنا سروشتێ كوردستانێ یه تایبه‌ت گول، پشكا دویێ ئاژه‌لێن كویڤی نه و دیمه‌نێن سروشتی، وێنه‌یان دفرۆشم به‌لێ ب كێمی دهێنه فرۆتن و كڕینا وێنه و سروشت و جوانیا ولاتی نه‌بوویه كلتۆر كو خه‌لك گرنگیێ بده‌تێ.
