وەرزشڤانێن ئەرجەنتینێ گرنگترین خەلاتێن فیفایێ ب دەستڤە ئینان
ئەڤرۆ
وەرزشڤانێن وەلاتێ ئەرجەنتینێ كۆنترۆل ل سەر گرنگترین خەلاتێن فیفایێ The Best كرن یا سالا 2022، ئەوا ل شەڤا دەربازبوویی ل پایتەختێ فرەنسا پاریس هاتیە كرن، ل دەستپێكا رێورەسمێن خەلاتكرنێ دا سەرۆكێ ئێكەتیا تەپا پێی یا فیفا جیانی ئنفانتینۆ سۆپاسیا وەلاتێ قەتەر كر ژبەر سەركەفتنا قارەمانیا جیهانی و دووڤدا خەلاتێ رێزلێنانێ بۆ چیڤانۆكێ بەرازیلی بیلێ ژلایێ هەڤوەلاتیێ وی رۆنالدۆ دا لیما بۆ خێزانا وی هاتە دان.
مێسی ناسناڤێ باشترینێ جیهانێ پاراست.
ستێرێ جیهانی و یاریزانێ یانەیا پاریس سانجێرمان یا فرەنسی لیۆنێل مێسی ناسناڤێ باشترین یاریزانێ جیهانێ The Best بۆ جارا دویێ دەستڤەئینا، جارا ئێكێ ل سالا 2019ێ بوو، د ڕاوەرگرتنا ئێكەتیا فیفایێ ئەوا 13 یاریزان هاتبوونە دەستنیشانكرن و ژلایێ شارەزا و پسپۆرێن تایبەتمەند و دووڤدا ژلایێ راهێنەرێن هەلبژارتیان، رۆژنامەڤانێن وەرزشی و پشتەڤانێن لسەر ئاستێ جیهانێ بوونە سێ یاریزان و پشتی دەنگدان ب دووماهی هاتی لیۆنێل مێسی شیا 52 خالان كۆمبكەت، هەڤالێ وی یێ یانەیا پارێس سانجێرمان یێ فرەنسی كێلیان مباپی 44 خال و هێرشبەرێ فرەنسی و ریال مەدرید كەریم بنزێما 34 خال كۆمكرن، بۆ زانین مباپی پێلاڤا زێری و بنزێمایی تەپا زێری یا فیفایێ ل 2022 ب دەستخوەڤە ئینابوون ئەوا لیۆنێل مێسی حەفت تەپێن زێری دەستڤە ئیناین.
سكالۆنی باشترین راهێنەرێ جیهانێ
ژلایەكێ دووڤە فیفایێ خەلاتێ باشترین راهێنەرێ جیهانێ بۆ یێ هەلبژارتیێ ئەرجەنتین لیۆنێل سكالۆنی هاتە دان پشتی دگەل هەلبژارتیێ خوە ناسناڤێ مۆندیالا جیهانی 2022 قەتەر و كۆپا ئەمریكا 2021 دەستڤە ئینایی و پێشكەڤیت ل سەر راهێنەرێ ئیتالیی و یانەیا ریال مەدرید یا ئسپانی كارلۆ ئەنشلۆتی و یێ ئسپانی و مانچستەر ستی یا ئنگلتەرایێ پیب گۆاردیۆلایی.
باشترین گۆلپارێز ژی ئەرجەنتینی بوو.
گۆلپارێزێ هەلبژارتیێ ئەرجەنتینی و یانەیا ئاستۆن ڤێلا ئیملیانۆ مارتینێز وەكو باشترین گۆلپارێز هاتە دەستنیشان كرن و پێشكەڤت ل سەر هەڤڕكێن خوە یێ بەلجیكی و یانەیا ریال مەدرید تیبۆ كۆرتۆا و یێ مەغربی و سیڤییا یاسین بۆنۆ.
ئەرجەنتینیان ب باشترین جەماوەر ژی هاتنە خەلاتكرن.
ئێكەتیا تەپا پێی یا فیفایێ جەماوەرێ وەرزشی یێ هەلبژارتیێ ئەرجەنتین باشترین پشتەڤان دا دیاركرن ئەوێ ژلایێ كارلۆس باسكۆال كەڤنترین پشتەڤانێ ئەرجەنتینی یێ 82ی سالی هاتبوو وەرگرتن.
بوو جارا دویێ ل دووڤ ئێك ئەلێكسیا باشترین یاریزانا كچ
ستێرا ئسپانی و یاریزانا یانەیا بەرشەلۆنا ئەلێكسیا بۆتیاس ناسناڤێ خوە یێ باشترین یاریزانا كچ بۆ جارا دویێ ل دووڤ ئێك پاراست پێشكەڤیت ل سەر هەڤڕكێن خوە بێس مید یاریزانا یانەیا ئارسنال و هەلبژارتیا ئنگلتەرا و یا هەلبژارتیا ئەمریكایێ ئەلێكس مۆرجان.
هۆلەندا ژی پشكەك ژ خەلاتان هەبوو.
راهێنەرا هۆلەندا و یا هەلبژارتیا ئنگلتەرا سارینا فیخمان وەكو باشترین راهێنەرا كچ ل جیهانێ هاتە دەستنیشانكرن پشتی ل سالا بۆری ناسناڤێ كۆپا ئۆرۆپا ب دەستڤە ئینایی.
ماری باشترین گۆلپارێزا كچ
ماری ئیربێس گۆلپارێزا ئنگلتەرا و یانەیا مانچستەر یۆنایتد وەكو باشترین گۆلپارێز هاتە دەستنیشانكرن و پێشكەفت ل سەر هەڤڕكێن خوە یا ئەلمانیا و یانەیا چێلسی ئان كاترین بێگر و یا تشێلی و ئۆلمپیك لیۆن كرێستیان ئاندلەر.
ناسناڤەكێ دیرووكی بۆ خودان پێدڤیێن تایبەت.
گۆلا یاریزانێ خودان پێدڤیێن تایبەت یێ بۆلەندی مارچین ئۆلیكسی هاتە دەستنیشان كرن وەكو باشترین گۆل ل جیهانێ و خەلاتێ بۆشكاش ژلایێ فیفایێ بوو هاتە پێشكێشكرن، چیرۆكا ژێڤەكرنا پێ وی ڤەدگەڕیت ددەمەكی دا كرێكاربوو بەری چەند سالان تووشی روودانەكێ بوو و پێ خوە ژ دەستدا، لێ هیڤیێن خوە ژ دەست نەدا هەتا گەهشتیە كۆپیتكێ و ناسناڤەكێ مەزن دەستڤە ئینایی، مارچین پێشكەڤت ل سەر یێ بەرازیلی ریتشالیسۆن و یێ دیمێتری باییە هێرشبەرێ مارسیلیا یا فرەنسی.
یاریزانەك ژ مرنێ قۆرتالكر و خەلاتێ گیانێ وەرزشی وەرگرت.
یاریزانێ جۆرجی لۆكا لۆسۆڤیلی خەلاتێ گیانێ وەرزشی یێ 2022 وەرگرت وەكو ئێك ژ كاریگەرترین روودان دناڤ یاریگەهێ دا هاتیە دیتن پشتی یاریزانەك د ماوەیێ یاریێ دا ژ مرنێ قۆرتالكری دەرئەنجامێ داعویرانا ئەزمانی كو ب لەز د هەوارا وی چوو بێ چاڤەڕێ هاتنا چارەسەرێ تیمێ بكەت.
پێكهاتیێ نموونە یێ فیفایێ.
ئێكەتیا تەپا پێی یا جیهانێ پێكهاتیێ خوە بۆ سالا 2022 بڤی شێوەیێ دەستنیشان كر، گۆلپارێز تیبۆ كۆرتۆا، هێلا بەرەڤانیێ، ئەشرەف حەكیمی، جواو كانسێلۆ، فێرجێل ڤان دایك، هێلا ناڤین، كێڤێن دی برۆیین، لۆكا مۆدرێچ، كارلۆس كاسیمیرۆ، هێلا هێرشبەریێ، لیۆنێل مێسی، كێلیان مباپی، كەریم بنزێمە و ئیرلینگ هالاند.
