وەزیرا چاندنێ: پێدڤیە نیڤەکا بەرهەمـێ گەنمێ جۆتیارێن هەرێمێ بهێتە وەرگرتن
هەولێر، قائید میرۆ:
وەزیرا چاندنێ یا حوكمەتا هەرێما كوردستانێ خویاكر، پێدڤیە حوكمەتا ئیراقێ نیڤا بەرهەمێ گەنمێ جۆتیارێن كوردستانێ وەربگریت و دبێژیت: جوداهی د ناڤبەرا پارێزگەهان دا دهێتە كرن.
بێگەرد تالەبانی، وەزیرا چاندنێ گۆت: «مە ل دۆر بڕیارا وەرگرتنا گەنمێ جۆتیاران ب نڤیسارا فەرمی هەموو لایەنێن پەیوەندیدار ل ئیراقێ ئاگەهداركرینە، ئەم رازی نابین ب ئەڤێ رێژەیا هاتیە دیاركرن، چونكی بەرهەمێ هەرێما كوردستانێ بۆ ئەڤ سالە دو ملیۆن تەنن، وەرگرتنا 292 تەنان ئەڤە ژی رێژەیەكا زۆر كێمە، چونكی پێدڤیە نیڤا بەرهەمێ جۆتیاران بهێتە وەرگرتن، نوكە ئەم چاڤەڕێی كۆمبوونا جڤاتا ئابووریا ئیراقێ دكەین، هەتا بەرسڤا چاندنا هەرێما كوردستانێ بهێتەدان».
بێگەرد تالەبانی گۆت ژی: «لیژنەیەك هەیە ب بڕیارا دیوانا سەرۆكایەتیا وەزیرێن ئیراقێ هاتیە پێكئینان، مە ناكۆكی ل گەل ئەڤێ لیژنا چاندنێ هەنە، ئەم دخوازین جوداهی د ناڤبەرا پارێزگەهان دا نەهێتە كرن، ژ بەركو غەدر ل جۆتیارێن كوردستانێ دهێتە كرن و پشكا پارێزگەهێن ناڤەڕاست و باشوورێ ئیراقێ وەكی یا هەرێما كوردستانێ نینە».
