وەزیرێ ناڤخۆ یێ هەرێمێ: پشتی ئارامیێ دێ دەڤەرا ئامێدیێ هێتە ئاڤەدانكـرن
ئامێدیێ، مەحمود نهێلی:
ڕێبەر ئەحمەد، وەزیرێ ناڤخۆ یێ حوكمەتا هەرێما كوردستانێ و فەریق عەزیز وەیسی، فەرماندێ فەرماندەیا زێرەڤانی سەرەدانەكا مەیدانی بۆ سنۆرێ دەڤەردارییا ئامێدیێ ئەنجامدا و د سەرەدانا خوە دا ب هەڤالینیا بەهرام عریف یاسین، بەرپرسێ لقێ 18 یێ پارتی ل ئامێدیێ و وارشین سەلمان، دەڤەردارێ ئامێدیێ سەرەدانا چەندین ناڤەند و خالێن سەربازی كرن و د ڕێورەسمەكێ دا، بارەگایێ نوو یێ فەرماندەییا زێرەڤانی ل ناوچەدارییا دێرەلۆكێ هاتە ڤەكرن.
رێبەر ئەحمەد، وەزیرێ ناڤخۆ یێ حوكمەتا هەرێما كوردستانێ د كۆنگرەكێ رۆژنامەڤانی دا گۆت: «ڕەوشا دەڤەرێ بەر ب ئارامیێ ڤەدچیت، ل داهاتی دەستێ ئاڤەدانیێ ژی دێ گەهیتێ، مە ب فەردیت ژ نێزیك ئاگەهداری رەوشا دەڤەرێ ببین و بزانین چو باشە بۆ دەڤەرێ بهێتە كرن».
گۆت ژی: «ئارامیەكا بەرچاڤ ل دەڤەرێ پەیدا بوویە و خەلكەكێ زۆر قەستا سەر گوندێن خوە كریە، زێدەباری وێ یەكی هێشتا هندەك ئارێشە مانە و ئەم چاڤەرێینە ئەو ژی بهێنە چارەسەكرن، خەلكێ مە ژی ب ئارامی ل ڤێ دەڤەرێ ژیانا خوە دەرباز بكەن».
ناڤهاتی سوپاسیا خەلكێ دەڤەرێ ژی كر ژ بەر خوەڕاگریا وان و گۆت: «خەلكێ ڤێ دەڤەرێ رۆلەكێ باش هەبوویە د شۆڕەشێن كوردی دا، قوربانیێن زۆر داینە و داستانێن مەزن ل ڤێ دەڤەرێ هاتینە تۆماكرن، هیڤیخوازین، ئەڤ پرۆسەیا ئاشتیێ یا د ناڤبەرا پەكەكێ و توركیا دا ب دروستی ب رێڤەبچیت و ئەڤ دەڤەرێن مایی ژی ڤەگەڕنە بن دەسهەلاتا حوكمەتا هەرێمێ و خەلكێ وان جهان ژی ڤەگەڕنە سەر جهـ و وارێن خوە».
