وەغـــەر
عەبدولرەحمان مەحموود
كەكێ منۆ..
ل كۆلانێن گوندێ مە
ئەڤرۆ هەمی لێ بوویە تازی
ئەو دایكا تۆ ژ هەمی دلێ خۆ
هەمبێز دكری ئەڤرۆ یا لسەر گۆڕێ تە
زێمارێن وەغەرا تە ڤەدلۆرینیت
ل وێ ڕۆژا تە باركری
خۆشیێ كراسێ ڕەشێ ل خۆ پێچای
شەرم دكەت جارەك دی كەیفێ
لسەر لێڤێن مە ببارینیت
چ نالین و زێمارن!
ڤی دلێ تژی ژغەریبیا تە
تەڤ خەما لێ ڤەدجەمینیت
كەكێ منۆ..
وەغەرا تە چیڕوكێن بیرهاتنێن مە
دناڤ پێلێن دەریایاندا
بۆ خۆ دبەن و تێك دشلقینیت
هەمی هیڤیان دگەریا مەدا
دخەندقینیت،
نەژڤان مان لتە بكەین گازی
نە دیوان مان پشتی تە لێ بكەین شاهی
بتنێ وێنەیێن تە دێ كەینە كەڤالەك و
چاڤێن تژی ڕۆندك ژ غەریبیا تە
لسەر نەخشینین
وێ كێلیا ناڤێ تە لسەر
دێ هۆزانێن پەسنا تە لسەر ڤەهوینین و
فاتحەكا بێ دوماهی
لسەر گۆڕا تە ڤەخوینین.
