وەك شەمالكا گۆڕان دێ گلۆپا نەوەی نوێ ژی ڤەمریت
دلۆڤان ئاكرەیی
د گۆڕەپانا سیاسی یا هەرێما كوردستانێ دا، درووشمێن ستراتیژی یێن كو هێزێن نوو ل سەر دئافرن، گەلەك جاران د تاقیكرنا بەرژەوەندی و هەڤپەیمانیێن پرۆسێسا سیاسی دا تووشی داڕمانێ دبن و ل سەر ڤی بنەمایی، ڤەلڤینا نەوەی نوێ كو ل دەستپێكا دەركەڤتنا خۆ، خۆ وەك دەنگێ ڕەهایێ نەڕازیبوونێ، جهگرێ سیستەمێ حوكمڕانیێ و هێزا سەرەكی یا ئۆپۆزسیۆنێ ل زۆنا كەسك دەستنیشان دكر، د نووترین پێشهات دا ڕووبەڕووی پێلەكا توند یا ڕەخنەیێن جادێ و چاڤدێرێن سیاسی بوویە و ئەڤ پاشەكشێیا سیاسی، كو پاش ڕێككەڤتنا وان دگەل ئێكەتی نیشتمانی كوردستان هاتیە هەبوونێ، وەك نیشانەكا ڕوون بۆ تەسلیمبوونا سیاسی و پاشەكشێ ل وان دروشم و پرەنسیپان تێتە نێرین كو پێشتر نەوەی نوێ بانگەشە بۆ دكر.
نەوەی نوێ ل سەر فەلسەفەیەكا ڕادیكاڵ یا دژایەتیكردنا پێكهاتەیا حوكمڕانیێ و ڕەتكرنا لێكتێگەهشتنێ دگەل هێزێن دەسهەلاتێ (پارتی و ئێكەتی) هاتبوو دامەزراندن، بەلێ ڕێككەڤتنا وان یا دویماهیێ سەلماند كو ئەڤ هێزە د ئەنجامدا نەچار بوو ملێ خۆ بۆ ئەجێندایێن ڕۆژەڤا سیاسی بچەمینیت و د بن سێبەرا ئێكەتیێ دا كار بكەت و ب ڤێ گوهرینێ، نەوەی نوێ پێگەهێ خۆ یێ ئۆپۆزسیۆنبوونا ڕاستەقینە ژدەست دا و هۆنەرێ مانۆڕا خۆ وەك پاشكۆیەكێ هێزەكا دەسەڵاتێ كورتكر و ل ئالیەكێ دی، سەرەڕای هەمی بزاڤێن نەوەی نوێ بۆ كێمكرنا پێگەیێ جەماوەری یێ، پارتی دیموكراتی كوردستان، بەلێ پارتی هەر وەك سەركەڤتیێ ئێكێ یێ هەلبژارتنان و جەمسەرێ سەرەكی یێ بڕیارا سیاسی ل هەرێمێ دی مینیت.
سیاسەتا لادانێ و پاشگوێخستنا خزمەتگۆزاریان ل پارێزگەها سلێمانیێ و دەڤەرێن زۆنا كەسك، كارتەكا بهێز بوو كو جەماوەر د هەڵبژارتنان دا دەنگێ خۆ ببەخشیتە نەوەی نوێ، نەك ژبەر هەبوونا ئایدیۆلۆژیایەكا بهێز و پێشەنگ ل دەڤ ڤێ حزبێ، بەڵكو وەك كارڤەدانەكا جەماوەری و سزادانا ڕەوشا تێكچووی یا دەڤەرێ بوو، د دەمەكێ دا كو دەنگدەرێ نەڕازی یێ سلێمانیێ ل هیڤیا هندێ بوو نەوەی نوێ ببیتە هێزەكا فشارێ بۆ گوهۆرینێن بنەڕەتی، بەلێ چوونە دناڤ حەوزا سیاسی یا ئێكەتیێ دا باوەریا دەنگدەران ل هەنبەر درووشمێن ئۆپۆزسیۆنێ ب ئێكجاری لۆك كر و ئەڤ پێنگاڤە وەك پاشەكشێ و ناپاكی ل دەنگێ وان هاتە دیتن.
ل سەر ئاستێ ناڤخووی، پێشبینی دهێتە كرن كو د پاشەڕۆژەكا نێزیك دا، ناڤمالا ڤێ حزبێ تووشی گوهۆرین و لێكترازان و ڤەقەتیانێن مەزن ببیت و ب پشتڕاستی ڤە ژمارەیەكا سەركردە و ئەندامێن دیار یێن نەوەی نوێ كو هێشتا دڵسۆزێ پرەنسیپێن ئۆپۆزسیۆنێ نە، دێ خۆ ڤەكێشن یان ل گەل ڤێ ئاڕاستەیا نوو یا حزبێ نەمینن و جودا ل ڤێ، پەرلەمانتارێن ڤێ ڤەلڤینێ د ناڤ هۆلا پەرلەمانی دا دێ هێنە ڕووبەڕووبوون ل گەل شۆكەكا سیاسی و ئەخلاقی، چونكی ئێدی نەشێن ب هەمان پۆتێنشیاڵ و توندی یا جاران ڕەخنێ ل سیاسەتێن دەسەڵاتا سلێمانیێ بگرن، ئەڤە ژی دێ بیتە ئەگەرەك كو هندەك ژ وان ڕێكا سەربەخۆبوونێ یان جودابوونێ بگرنەبەر و ب خواندنا من ڕێككەڤتنا نەوەی نوێ دگەل ئێكەتیێ، خالەكا وەرچەرخانێ بوو كو تێدا ماسكێ ئۆپۆزسیۆنێ ل سەر ڕوویێ ڕاستەقینە یێ نەوەی نوێ كێشا و ڤێ ڕوودانێ سەلماند كو دروشمێن درێژدەم یێن دژی دەسەڵاتێ، بتنێ پێژەك بوون بۆ گەهشتن ب مەرامێن سیاسی و د ڤی وێنەیێ دا، واقیعی سیاسی یێ كوردستانێ یێ پێكهاتوو ژ هێزا سەرەكی (پارتی) وەك ڕاستیەكا جێگیر و نەگۆڕ مایەڤە، د دەمەكێ دا كو نەوەی نوێ باوەری و سەرمایەیێ خۆ یێ جەماوەری بەر ب فۆرمەكێ بەرزەبوونێ بر و پارتی ژی، ژبەر چەندین فاكتەرێن ستراتیژی وەك جێگیری و ڕێكخستنا بهێز یا جەماوەری، پاراستنا سەقامگیری و پارێزگاریكرن ژ پێگەیێ قەوارەیێ دەستووری یێ هەرێمێ، و ئەنجامدانا پرۆژەیێن ئاڤەدانیێ و ژێرخانەیێن خۆدان ڤەژاندن، دێ وەك هێزا ئێكێ و پێشەنگ د كێشانا نەخشێ سیاسی یێ هەرێمێ دا بەردەوام بیت.
