١٢٨ سـال كـار و بەرپرسیاری
فـازل میرانـی *
128 سال ژ بەرییا ئەڤرۆ، میرزادەیەكێ كورد (مقداد میدحەت بەدرخان) خەما نەتەوەیا خۆ هەلگرتبوو، كو ل وەلاتێ غەریبیێ (مسر)ێ دا، پڕۆژەیێ سەرخۆبوونا نەتەوەیا خۆ ب دەرئێخستنا ڕۆژنامەیا (كوردستان) ل ٢٢ی نیسانا ١٨٩٨ ڕاگەهاند بوو. هەر ژ وی دەمی و هەتا نها، هەردەم ڕۆژنامەنڤیسێن كورد د سەنگەرێ داكۆكیكرنێ ل هەبوون و مانەڤەیا كوردان، كار ژ بۆ گەهشتن ب خواستێن ڕەوای یێن نەتەوەیا مە كرن، گەشەپێدانا زمان و كولتوورێ كوردی و زێدەتر ئاگەهداركرنە و هوشیاركرنا نفشان دا، كار كرینە و دبەردەوامن.
جهێ خۆشحالیێ یە، ئەڤڕۆ میدیا و ڕۆژنامەگەریا كوردستانێ بوویە ئێك ژ فاكتەرێن هەرە كاڕا و كاریگەریێن بەرگریكرن ژ دۆزا نەتەوەیا مە و كاركرن ل سەر ئاستەكێ بەرزێ پیشەیی، ب بزاڤا بەرز ڕاگرتنا پەیاما برایەتیێ، یەكسانیێ و مافان، ئەڤانە هەموو ژی بەشەكن ژ بهایێن مرۆڤایەتیێ و جڤاكا نێڤدەولەتی پشتگیریێ دكەت. پێدڤیە ئەڤێ چەندێ ژی بێژین كو ل ناڤا میدیا و ڕۆژنامەگەریا كوردی دا، كەنالێن وەسا ژی هەنە كو كاركرنا وان ژ ڕوویێ پیشەیی و بەرپرسیاریەتیا نەتەوەیی و نیشتمانی ڤە، ل ئاستێ خواستێن خەلكی و ئیتێكێن ڕۆژنامەڤانی دا نینە، چونكو ڕووبەرێ كاركرنا خۆ ل سەرزەمینەیا نەتەوە و نیشتمانی ڤە بەر ب مەیدانەكا بەرتەنگتر ڤە برینە و گۆتارا خۆ یا گرێدای گرۆپ و دەستەیێن بچووكتر ژ نەتەوە و خوارترێ ژ شكۆیا نیشتمان كریە.
بۆ ئەڤێ بیرەوەریا شكۆدار، پیرۆزباهێن خۆ یێن گەرم ئاراستەی سەرجەم ڕۆژنامەنڤیس و میدیاكارێن كوردستانێ دكەم. ئەم هەڤكار و پشتەڤانێن كار و پەیاما پیرۆزا ئەوانین، بەرپرسیاریا مە و ئەوان و تەڤایا خەلكێ كوردستانێ د كۆكا خۆ دا ئێكە و ڕوی ل بدەستڤەئینانا مافێن مرۆڤی یێن نەتەوەیەكی كار دكەین. ب ڕێز و شكۆ ڤە ڕۆژنامەنڤیسێن كوردستانێ ل هەموو قووناغان دا، هەردەم پشكەك بوون ژ تێكۆشانا نەتەوەیا بۆ بدەستڤەئینانا ئازادی و سەرفرازیێ.
بەرز و پیرۆز بێت جەژنا ڕۆژنامەنڤیسێن كوردستانێ.
* بەرپرسێ دەستەیا كارگێری یا مەكتەبا سیاسی 22/4/2026
